Ҳусанов трансфери билан шуғулланган агент “Барса”га зўр ҳужумчи олиб келмоқчи

Абдуқодир Ҳусановнинг трансфери бўйича ишлаш учун “Ланс” томонидан ёлланган машҳур футбол агенти Жорже Мендеш энди “Барселона”га ўйинчи жойламоқчи.

Португалиялик мутахассис ўз ҳамюрти Рафаэль Леауни “Милан”дан олиб кетишга қарор қилган. Қишки трансферлар даврида Мендеш ўз мижозини Саудия Арабистонининг “Ан-Наср” клубига жойламоқчи бўлди.

Бироқ шайхларнинг 70-85 миллион евро атрофида таклиф қилган бадал пули миланликларни қониқтиргани йўқ. “Милан” билан амалдаги шартномада Леаунинг бадал суммаси 175 миллион евро экани кўрсатилган.

Энди Леаунинг трансфери ёзга қолди. Бундан унумли фойдаланишни мақсад қилган Жорже Мендеш ҳужумчига “Барселона”дан иш топиб бермоқчи. Қизиғи шундаки, молиявий қийинчиликларни тўлиқ бартараф этиб бўлмаган “Барселона” Леау учун ҳам харажат қилиши талаб этилади. Чунки футболчининг амалдаги битими ҳали уч йил давом этади.