Ҳусанов тайёрлан! Машҳур агент Жорже Мендеш Абдуқодирни қайси жамоага жойлайди?
- 22-декабр 2024, 23:59
- Zohir Toshxo’jayev
- 1
- Футбол
Январь ойида Абдуқодир Ҳусановнинг фаолиятида кескин бурилишлар бўлиши мумкин. “Ланс” молиявий фэйр-плей доирасида 40 миллион евродан кўпроқ маблағ топиши шарт. Европанинг гранд клублари Ҳусанов трансфери бўйича лансликларга босим ўтказа бошлади.
Европа футболини ёритиб келаётган culturepsg.com сайти эксперти Жан Шемарин “Ланс” атрофидаги вазиятни шарҳлади.
- “Ланс”ни қишда тарк этиши кутилаётган Абдуқодир Ҳусанов “Пари Сен-Жермен” қидираётган марказий ҳимоячи профилига тўлиқ мос келади. Бироқ бу ўйинчи атрофида катта рақобат юзага келган.
2023 йилнинг ёзида 100 минг еврога олинган футболчини “Ланс” январда 300 баравар қимматига, яъни 30 миллион еврога трансфер қилиши мумкин.
Ҳусанов – ҳозир “Ланс”нинг энг зўр ўйинчиси. Айнан шу футболчини таркибдаги жойини сақлаб қолиш учун бош мураббий Уилл Стилл кўп йиллик тактик схемадан воз кечиб, тўртта ҳимоячи билан ўйнай бошлади. 20 ёшли универсал ҳимоячи орқа чизиқнинг исталган нуқтасида ишончни оқлай олади.
ПСЖ Ҳусановни қишда кетиши кутилаётган Милан Шкриньяр ва яқин келажакда жамоа сардори Маркиньоснинг ўрнига ҳимоя чизиғини бошқарадиган ҳимоячи сифатида танлаган, - деб ёзди culturepsg.com сайти эксперти Жан Шемарин.
“Ланс” молиявий муаммоларини ҳал қилиш мақсадида Ҳусанов учун 30 миллион евро атрофида ҳақ талаб қилади. Клуб раҳбарияти ўйинчининг шу нарх атрофида трансферини ташкил қилишни машҳур агент Жоже Мендешга топширди.
- Жорже Мендеш Ҳусановга қизиқаётган ПСЖ спорт директори Луис Кампуш билан дўстона алоқага эга. Бундан ташқари, португалиялик мутахассис бу трансферга Европанинг қатор клубларини жалб қилиши мумкин.
Хусусан, Жорже Мендеш ўзининг кўптармоқли алоқаларига таянган ҳолда бу жараёнга “Ньюкасл”, “Лестер Сити”, “Манчестер Сити”, “Тоттенхэм”, “РБ Лейпциг”, “Байер”, “Наполи”, “Атлетико Мадрид” каби клубларни қамраб ола билади.
Юқорида номи келтирилган жамоалардан бир нечтаси Абдуқодир Ҳусановни қишки трансферлар вақтида қўлга киритишга уриниб кўрмоқчи. Демак, вазиятни кузатмиз, - деб ёзди foot-sur7.fr эксперти Жан Люк.
Абдуқодир Ҳусановнинг трансфер нархи transfermarkt.world порталида 12 миллион еврога етгани қайд этилган. Бу кўрсаткич бўйича 20 ёшли легионеримиз Марказий Осиёнинг энг қимматбаҳо ўйинчиси ҳисобланади. Бироқ “Ланс” ҳимоячини қўйиб юбориш учун бу суммадан анчагина юқори нарх талаб қилмоқда.