Ҳусанов “Ньюкасл”га ўтиши керак эди, Файзуллаев эса...
- 6-феврал 2025, 11:01
- Ali Ahmadxo’jayev
- 2
- Футбол
Ўзбекистондан етишиб чиққан энг ёрқин истеъдодлар орасида Абдуқодир Ҳусанов ва Аббосбек Файзуллаевнинг ўз ўрни бор.
20 ёшли ҳимоячи Абдуқодир Ҳусанов қисқа фурсатда Европанинг энг қудратли клубларидан “Манчестер Сити” сафига қўшилди. Айни пайтда Россия Премьер-лигасида ЦСКА жамоаси шарафини ҳимоя қилаётган 21 ёшли Аббосбек Файзуллаевнинг “кўҳна қитъа”га йўл олиши охирги икки йил ичида энг кўп муҳокама қилинаётган мавзулардан ҳисобланади.
“Сурхон” жамоасида фаолият юритаётган мураббий Станислав Кудряшов Россиянинг “БИЗНЕС Online” нашрига берган интервьюси ҳар икки футболчи ҳақида ўз фикр-мулоҳазаларини билдириб ўтди.
- Абдуқодир Ҳусанов жисмоний кўрсаткичлари табиатан кучли бўлган бақувват футболчи. Унинг устун жиҳатлари атлетизм ва куч-қудратида.
Ҳусановни ёрқин келажак кутмоқда, лекин у ўзини бир йил давомида кузатиб келган “Ньюкасл”га ўтганида яхши бўларди. Аслида ўша жамоага ўтиши керак эди, бироқ футбол – бу бизнес, пул дегани. Унга Франциядан Англия футболига мослашишида ўтиш даври бўлиши керак эди.
ЦСКАда тўп тепаётган Аббосбек Файзуллаев “Пахтакор” ёшлар жамоасида менинг қўл остимда икки йил ўйнаган.
Жуда талантли йигит, Худо уни иқтидор билан сийлаган, жуда яхши футбол ўйнайди. Агар кейинчалик яна яхши клубга тушса, келажаги порлоқ.
Мен уни Испани ва Португалия футболига мос ўйинчи, ўша мамлакатлар клубларида ўйнайдиган футболчи сифатида кўраман. Англияда жисмоний томондан бироз қийин бўлади, чунки кўрсаткичлари унчалик тўғри келмайди, - деди Станислав Кудряшов.
Эслатиб ўтамиз, Абдуқодир Ҳусанов футболнинг дастлабки сир-асрорларини “Бунёдкор” академиясида ўрганган. Профессионал фаолиятини 2022 йили Беларусь чемпионатида “Энергетик-БГУ” жамоасида бошлаган.
Бир йилдан кейин Франциянинг ўша пайтдаги вице-чемпиони “Ланс”га кўчиб ўтди. Бу жамоада ўз иқтидорини намойиш қилган марказий ҳимоячи Европанинг бир қатор гранд клублари ўртасида талаш бўлди.
20 январь куни Англиянинг амалдаги чемпиони “Манчестер Сити” Абдуқодир Ҳусановни бонуслар билан қўшиб ҳисоблаганда 50 миллион евро эвазига ўз сафига қўшиб олди.
Ҳусанов Франция ва Англия юқори дивизионида иштирок этган биринчи ва ҳозирча ягона ўзбек футболчиси ҳисобланади.
Аббосбек Файзуллаев эса, “Пахтакор” тарбияланувчиси ҳисобланади ва профессионал фаолиятини Ўзбекистон суперлигасида бошлаган. Файзуллаев 2023 йилнинг августида Москванинг ЦСКА клубига кўчиб ўтди.
Легионер сифатида юқори савияда ўйнаб келаётган футболчимизга кейинги йилларда Италия, Испания, Франция ва Германия жамоаларидан қизиқиш бўлаётгани ҳақида маълумотлар тарқатилмоқда.