Ҳусанов бўйича сўнгги маълумот: Абдуқодирга бешта гранд даъвогар!
- 21-ноябр 2024, 08:00
- Zohir Toshxo’jayev
- 3
- Футбол
Қишки трансфер ойнаси яқинлашгани сари Абдуқодир Ҳусанов атрофидаги ахборот алмашинуви ҳам тезлашиб бормоқда.
Европанинг қатор нуфузли манбалари 20 ёшли ҳимоячининг гранд клублар нишонида тургани, улардан айримлари “Ланс”дан трансфер маълумотларини олгани, Ҳусанов фаолиятида ўзгариш бўлиши кутилаётгани ҳақида турли ахборотларни тарқатмоқда.
Sports.uz портали ўзбекистонлик футбол ишқибозлари эътиборига хориж манбаларининг Ҳусанов трансферига оид тарқатаётган материалларини ҳавола этади.
Энцо Пайлот, le11hdf.fr портали эксперти:
Мавсум бошидан бери ёрқин ўйин кўрсатаётган Абдуқодир Ҳусановни “Ланс” узоқ муддат ушлаб тура олмайдиган кўринади. “Марсель” назарига тушган ўзбек футболчиси энг қимматли активлардан бири сифатида лансликлар бюджетига яхшига даромад олиб келиши мумкин.
“Ланс” президенти Жозеф Угурлян ўтган ёзда футболчиларнинг чиқиш трансферидан 111 миллион евро ишлаб олишни мўлжаллаган эди. Нил Ал-Айнауининг “Монако”га ва Кевин Дансонинг “Рома”га трансфери барбод бўлиши оқибатида клуб раҳбари ўз мақсадига ета олмади. Энди Абдуқодир Ҳусановнинг трансфери ғазнага тушум келтириши кутиляпти.
Трансферларга ихтисослашган машҳур инсайдер Николо Скиранинг маълум қилишича, ўзбек футболчисига Европанинг бир неча грандалари, хусусан “Марсель” даъвогарлик қилмоқда. Ҳимоя чизиғида муаммоларга дуч келаётган марселликлар қишки трансферлар даврида ўзбек легионерини қўлга киритишга уриниб кўради.
Марселликлар Ҳусановни шанба куни бўладиган ўзаро учрашувда бевосита кузатмоқчи эди. Бироқ ПСЖ билан баҳсда қизил карточка олган Абдуқодир “Марсель”га қарши ўйинни ҳам ўтказиб юборади.
Бу маълумотларни news.dayfr.com сайти ҳам тасдиқлади.
“Марсель” ҳимоя чизиғидаги мувозанат ва барқарорликни тиклаш учун “Ланс”нинг юқори салоҳиятли ёш ўйинчиси Абдуқодир Ҳусановни қишки трансферлар вақтида ўз такибига қўшиб олмоқчи.
“Ланс” хўжайинлари қимматбаҳо активни қишда сотиш маъқулми ёки бу масалани ёзга қолдириш фойдалами, бу борада бир қарорга келиб олиши лозим. Ҳусановга ПСЖ ва бошқа бир неча грандларнинг қизиқаётгани мавсум охиригача ўйинчининг нархи яна кўтарилишига олиб келади.
“Марсель” ҳимоянинг нозик нуқтасини “Ланс” ҳимоячиси Абдуқодир Ҳусанов ёрдамида ёпиш учун қишки трансферлар даврида фаоллик кўрсатишга тайёрланяпти. Ёзда бир неча янги футболчи олинганига қарамай, марселликлар чемпионатнинг иккинчи ярмига пухта ҳозирлик кўриш учун яна трансферларга қўл уради.
Жамоа бош мураббийи Роберто Де Дзербини ўзбек футболчисининг универсаллиги ва юқори салоҳияти ўзига жалб этмоқда.
“Ланс” билан 2027 йилнинг ярмигача давом этадиган шартномага эга ўйинчи Transfermarkt экспертлари томонидан 5 миллион еврога баҳоланган. Бу нарх марселликларни қониқтаради.
Абдуқодир Ҳусанов 20 ёшидаёқ “Ланс” етакчисига айланди. Ўзбекистон миллий терма жамоаси ўйинчиси ҳар томонлама етуклиги, тактик интеллекти, заковати ва майдонда позиция танлай олиш қобилияти билан бошқалардан яққол ажралиб турибди.
“Ланс” билан 2027 йилнинг ярмигача боғланган ўйинчини олиб кетиш осон бўлмайди. Чунки лансликлар ўз ўйинчисининг трансфер қийматини яхши билади.
Transfermarkt портали ўзбек футболчисини 5 миллион еврога баҳолаётган бўлса-да, унинг трансфери харидорларга анча қимматга тушади.
Таниқли журналист Николо Скирага кўра, “Ланс” потенциал харидорлар, хусусан, “Марсель”дан 40 миллион евро талаб қилиши мумкин.
Ўзбек футболчиси – Абдуқодир Ҳусанов ёрқин ўйинлари бидан бир неча грандларни ўзига қаратди. 20 ёшли марказий ҳимоячига беш клуби – “Челси”, “Тоттенхэм”, “Пари Сен-Жермен”, “Марсель” ва “Байер” кўз тикмоқда.
Лондоннинг икки клуби “Ланс”дан трансфер маълумотларини сўраб олди. “Марсель” ва ПСЖ ўзбек футболчисини мунтазам кузатиб келмоқда. Хаби Алонсо жамоасининг Ҳусанов учун курашга қўшилгани гранд клублар ўртасидаги рақобатни кучайтирди.
Шунга қарамай, Allez Lens нашри “Ланс” хўжайинлари қишки трансферлар вақтида марказий ҳимоячилардан Кевин Дансони ва айниқса, Абдуқодир Ҳусановни қўйиб юбормоқчи эмас.
Таъкидлаш жоизки, Европа клублари асосий трансферлар кўпинчи ёзги трансферлар вақтида амалга оширади. Шу нуқтаи назардан, Абдуқодир Ҳусанов учун кураш асосан мавсум якунланганидан кейин бошланади. Агар бирор гранд клуб фавқулодда катта маблағ тикмаса, Абдуқодир чемпионатни “Ланс” таркибида якунлаб қўяди.