Ҳусанов, хотиржам ўйнайвер, чунки...
- 25-сентябр 2024, 22:35
- Zohir Toshxo’jayev
- 0
- Футбол
“Ланс”да ўйнаётган марказий ҳимоячимиз Абдуқодир Ҳусановнинг атрофида мураккаб вазият юзага келиб қолган эди. Ҳали ҳам бу масала тўлиқ ечимини топмаган.
Франция клуби 2023 йилнинг ёзида ёш футболчимизни жамоа ҳимоя чизиғи етакчиси Кевин Дансога ўринбосар сифатида олиб келгани кўп бора айтилди. Ўтган мавсум Абдуқодир Франция чемпионати, Европа Чемпионлар лигаси ва Европа лигасида турли сабабларга кўра ўйинда иштирок этолмаган асосий ҳимоячилар ўрнига майдонга тушиб, тажрибали жамоадошларининг ўрнини тўлиқ боса олишини кўрсатди.
Бу орада “Ланс” ўз режасига амал қилиб, Кевин Дансони “Рома”га кейинчалик сотиб олиш ҳуқуқи билан бир мавсум ижарага беришга келишди. Ушбу трансфер лансликларга 25 миллион евро келтириши кутилганди.
Аслида ҳам лансликлар 2021 йили 5,5 миллион еврога Германиянинг “Аугсбург” жамоасидан сотиб олган ва бир неча мавсум ўйнатиб, қимматига сотишни режалаштирган эди. Бу режа амалга ошмай қолди.
Австрия терма жамоасининг 26 ёшли ҳимоячисини тиббий кўрикдан ўтказган “Рома” унинг юрагида нуқсон борлиги аниқлангани учун трансфердан воз кечди.
Дансо яна “Ланс”га қайтди. Бу орада Абдуқодир Ҳусанов Лига 1 ва Конференциялар лигасидаги ишончли ўйинлари билан жамоа қўллайдиган уч ҳимоячили тактикада Кевин Дансонинг ўрнини ўзиники қилиб бўлганди.
Бош мураббий Уилл Стилл олдида ақлли ечим қилиш керак бўлган янги масала бўй кўрсатди. Унинг бошчилигидаги мураббийлар штаби ҳимоя чизиғини маҳорат билан бошқараётган Абдуқодир Ҳусановни яна захирага қайтарадими? Ёки Ҳусановни ҳимоянинг бошқа нуқтасига олиб ўтадими? Ҳар ҳолда “Ланс” энг қиммат активларидан бўлган Кевин Дансо навбатдаги харидорга трансфер қилинмагунича уни ўйин амалиётисиз қолдирмаса керак?
Хуллас, жавобини кутаётган саволлар чиқаверади.
Ҳозирча, Абдуқодир Ҳусанов асосий таркибдаги мавқеини мустаҳкамлаб олиш учун етарлича вақт ва имкониятга эга.
Европа матбуотининг ёзишича, Кевин Дансонинг юрагида аномалия борлиги аниқланган. Яъни, ҳимоячининг юрагида чандиқлар пайдо бўлган. “Рома” айнан мана шу сабаб трансферни бекор қилди. Дансо Римга боргунича учта учрашувда қатнашди, лекин юраги безовта қилмаган. Аввал ҳам буни билмаган.
Ўйинчига чуқурлаштирилган тиббий кўриклардан кейин аниқ ташхис қўйилди. Энди унинг юрагида жарроҳлик амалиёти ўтказилади, чандиқлар олиб ташланади ва махсус ускуна ўрнатилиши режалаштирилган.
Кевин Дансо майдонга қайтишдан ойдин тикланиш жараёнини бошдан ўтказади. Ҳар ҳолда бу амалиёт бир неча ой вақт олиши мумкин. Бу даврда эса, унинг ўрнида Абдуқодир Ҳусанов ўйнаб туриши тобора ойдинлашиб бормоқда.