Гвардиола “Сити”да катта йўқотиш бўлганини тасдиқлади

“Манчестер Сити” бош мураббийи Хосеп Гвардиола ўтган мавсумнинг катта қисмини оғир жароҳат туфайли ўтказиб юборган “Олтин тўп” соҳиби Родри яна сафдан чиққанини ва айни пайтда даволанаётганини тасдиқлади.

29 ёшли футболчи 2024 йилнинг кузида тиззасидан жиддий жароҳат олиб, 2025 йилнинг май ойи охиригача майдондан узоқ юрган эди. ёзда АҚШда ўтказилган клублар ўртасидаги жаҳон чемпионатида Родри “Ал-Ҳилол” билан баҳсда яна шикастланди.

- Родри оғир жароҳатдан кейин жуда яхши тикланаётган эди, бироқ “Ал-Ҳилол”га қарши баҳсда бу гал чов қисмидан оғир жароҳат олди. Биз сентябрь ойида бўладиган икки ҳафталик халқаро танаффусдан кейин унинг майдонга қайтишига умид қиляпмиз.

Биз Родри жароҳат билан ўйнашини истамаймиз. У энг аввало, тўлиқ тикланиб олиши шарт, - деди Хосеп Гвардиола.

“Манчестер Сити” Англия Премьер-лигасининг янги мавсумдаги илк учрашувини 16 август куни “Вулверхэмптон” майдонида ўтказиши белгиланган.