Ғалаба қозонган "Ливерпуль" "Сити"га яқинлашди, "Арсенал" ва "Лестер"да дуранг

Англия Премьер-лигаси 23-тури доирасидаги 3 ўйин якунига етди. "Ливерпуль" Лондонда "Кристал Пэлас" меҳмони бўлди ва 3:1 ҳисобида зафар қучди. Мазкур 3 очко пешқадам "Сити" билан орадаги тафовут 9 очкогача қисқаришига сабаб бўлди.

Шунингдек, "Арсенал" ўз майдонида "Бёрнли" билан муроса кўчасини танлади. Томонлар 0:0 ҳисобидаги дурангга имзо чекди.

Яна бир учрашувда "Лестер" ҳамда "Брайтон" ўзаро муносабатларга ойдинлик киритиб олди. Мезбонлар сафида Патсон Дака томонидан киритилган голга меҳмонлар Дэнни Уэлбекнинг аниқ зарбаси орқали жавоб қайтарди.