Февзи Давлетов: "Рақиб орқага чекиниб ишимизни осонлаштирди"

Суперлига 12-туридан ўрин олган Сурхон – Металлург (2:1) учрашувидан сўнг мезбонлар бош мураббийи Февзи Давлетов матбуот анжуманида иштирок этди.

"Биринчи навбатда футболчи ва мухлисларимизни ғалаба билан табрикламоқчиман. Қийин ўйин бўлди. Илк бўлимда бизга тезлик етишмади. Йигитлардан қанотлар орқали ўйнашни илтимос қилдик. Рақиб марказда бизга яхши қаршилик кўрсатиши ва шунга ўхшаш бошқа кўплаб факторларни ўйиндан олдин ўрганган эдик. Майдон марказида тўпни олиб қўйиб, тезкор қарши ҳужумларга ўтишни режа қилган эдик. Камчилик бўлиб қолгач, йигитлар танаффусда гаплашиб олишди. Бу вазиятда рақиб орқага чекиниб бизни ишимизни осонлаштирди. Бу ўз-ўзидан бизга вазиятлар яратиш учун қўшимча бўш зоналар тақдим этди. Ўйлашимча, биз учун яхши дарс бўлди.

Агар рақиб юқорироқ чиқиб ҳаракат қилганида ва прессинга урғу берганида, анча қийнаб қўйган бўлар эди. Улар бизни ишимизни анча енгилатиб беришди. Бизга бўшлиқ бериб, ҳужумларимиз учун зона очилди. Қўшимчасига, жарима майдончаси ичига ишонч билан кирдик. Мураббийлар штаби доим футболчилардан 3-4 киши бўлиб жарима майдончаси ичига кириш кераклигини такрорлайди. Менимча, йигитлар ҳаммасини тўғри тушунишди.

Потапов жамоа билан шуғулланмоқда. Албатта, тез орада унинг тақдирига аниқлик киритамиз. Барчаси, унга боғлиқ. Ўйлашимча, яқин орада ҳаммаси ҳал бўлади. Олдинда иккита ўйин қолмоқда. Ундан кейин нимадир дейиш мумкин".