Файзуллаевга хушхабар!
- 5-июн 2024, 18:55
- Zohir Toshxo’jayev
- 0
- Футбол
ЦСКАдаги легионеримиз Аббосбек Файзуллаев Россиядаги дебют мавсумида жамоавий ютуқларни қўлга киритганмаган бўлса-да, индивидуал совринларни жамғариш давом этмоқда.
Бир неча кун муқаддам Россия Премьер-лигаси қаҳрамонларини тақдиришлаш маросимида “Мавсум кашфиёти” номинациясида ғолиб чиққан Аббосбек Файзуллаевга яна бир бир хушхабар келди.
ЦСКА клуби ўзининг ижтимоий тармоқлардаги саҳифаси орқали Аббосбек Файзуллаев жамоада май ойининг энг яхши ўйинчиси, деб топилганини эълон қилди.
Ойнинг энг яхши футболчисини аниқлаш мухлислар ҳамда 11 нафар экспертлар иштирокида овоз бериш йўли билан аниқланади. Гарчи мутахассислар танловида Тамерлан Мусаев кўпроқ овоз тўплаган бўлса-да, мухлисларнинг аксарияти Аббосбек Файзуллаевга овоз берган.
Аниқроқ айтганда, “армиячилар”га тарафдорлик қиладиган футбол ишқибозлари берган овозларнинг 46 фоизида ойнинг энг яхши футболчиси сифатида айнан ўзбек футболчиси кўрсатилган. Унинг энг яқин таъқибчиси Тамерлан Мусаев икки баравар кам – 23 фоиз овоз йиғди.
Бундан ташқари, ушбу номинацияни ўтказиб келаётган ЦСКАнинг бош ҳамкори – APOTHEKA компанияси ҳам май ойининг энг яхши футболчиси сифатида Аббосбек Файзуллаевни эътироф этган.
Таъкидлаш жоизки, бу ҳужумкор футболчимизнинг биринчи соврини эмас. Мавсумнинг бошида Файзуллаев бу танловда кетма-кет уч маротаба ғолиб чиққан.
Легионеримиз сентярь, октябрь ва ноябрь-декабрь ойларида ташкил этилган танловда ҳам энг кўп овоз тўплаган.
Эслатиб ўтамиз, ўтган йилнинг августида “Пахтакор”дан ЦСКАга 500 минг евро эвазига кўчиб ўтган Аббосбек Файзуллаев Россия Премьер-лигаси ва мамлакат кубогида жами 32 маротаба майдонга тушиб, бешта гол ва 14 та ассист муаллифи бўлди.
Ҳужумкор футболчимизнинг трансфер нархи бир мавсумда бир неча баравар кўтарилиб, айни пайтда 5 миллион еврони ташкил қилмоқда. Файзуллаев икки тажрибали ўйинчи – Элдор Шомуродов ва Бахтиёр Зайнутдинов билан бирга Марказий Осиёнинг энг қимматбаҳо футболчиси ҳисобланади.
Ўзбеклар ўйнайдиган Олимпиадада Мбаппега ўрин йўқ!
Ўрунов Машариповдан чемпионликни тортиб олди ёхуд яна қайси футболчиларимиз Эронни забт этган?
Шомуродовни олиш осон бўлмаяпти...