Файзуллаев “йўқолиб” қолди!
- 25-апрел 2025, 07:07
- Zohir Toshxo’jayev
- 1
- Футбол
2023 йилнинг августида “Пахтакор”дан ЦСКАга кўчиб ўтган Аббосбек Файзуллаев қисқа фурсатда “армиячилар”нинг етакчи ўйинчисига айланди.
Ҳужумкор футболчимиз легионер сифатидаги дастлабки мавсумидаёқ Россия Премьер-лигасининг энг ёрқин кашфиёти сифатида эътироф этилди.
Жорий мавсумнинг биринчи ярмида ҳам 21 ёшли ҳамюртимиз ЦСКАнинг ўйинларида муҳим фигура бўлиб келган эди. Бироқ қишки танаффумда “армиячилар” бош мураббийи Марко Николич жамоанинг ўйин схемасини кескин ўзгартирди.
Бу янгиликлар Аббосбек Файзуллаев ўйинига жуда катта таъсир ўтказди. Легионеримизнинг майдондаги жойи ва вазифалари ўзгарди, қиладиган иши кўпайди. Ҳозир ҳам Аббос янги амплуага мослашиш жараёнини бошдан ўтказяпти. Табиийки, буларнинг бари унинг ўйинининг вақтинча пасайишига олиб келди.
Россия футболи экспертлари бу борада ўз фикр-мулоҳазаларини билдириб ўтди.
Владимир Пономарёв, ЦСКА собиқ ҳимоячиси:
Аббосбек Файзуллаев кейинги пайтда жисмоний тайёргарлик бўйича қийинчиликларга дуч келяпти. Бу яхши футболчи, бор-йўғи 21 ёшда! У ҳам жисмонан, ҳам руҳан толиқиб қолди. Уни роса мақташган, “Реал” даражасидаги ўйинчига чиқариб қўйишганди.
Зўр футболчи бўлиш учун йўлни бошида турган ўйинчиларга алоҳида эътибор билан ёндашиш лозим. Чунки уларнинг ўзига хос дунёқараши бўлади. Кўп мақтаб бўлмайди, аксинча, ҳар бир ўйиндан кейин ўзига танқидий баҳо беришни сингдириш керак. Улар ўз устида ишлаши ва хатоларини тузатиши керак.
Файзуллаев ҳали ёш. Баъзан унга ортиқча юклама бериб юбориляпти. Ҳозирча уни жамоадаги марказий фигурага айлантирмаслик керак эди. Уни жисмоний юкламаларга бир маромда тайёрлаб борса бўларди. Органимзни тикланишини кутиш ва шундан кейин уни ишга солиш лозим. Мана шунақа хато ёндашувлар туфайли Аббосда жисмоний пасайишлар юзага келди. Энди тикланишини кутишга тўғри келади.
Александр Гришин, ЦСКАнинг собиқ футболчиси:
Аббосбек Файзуллаев – вингер, яъни қанот ҳужумчиси. Қанотларда ўзини жуда эркин ҳис қилади. Ҳозир ЦСКА уни бошқа позицияга қўяпти ва вазифаларини қийинлаштириб юборяпти.
Шу боис, кейинги пайтда Аббосбек майдонда “йўқолиб”, кўринмай қоляпти. Илгари Файзуллаев жуда эркин ўйнар эди.
Аббосбек Файзуллаев жорий мавсумда Россия Премьер-лигаси ва мамлакат кубоги доирасида 32 та учрашувда иштирок этиб, учта гол ва еттита ассист муаллифи бўлди.