Файзуллаев яна бир совринга даъвогар!

ЦСКА клуби жорий мавсумнинг биринчи қисмидаги энг яхши футболчисини аниқлаш учун сўровнома ташкил қилди.

Ғолиблик учун ўн нафар “армиячи” номзоди кўрсатилган. Улар орасида жамоа ҳужумкор футболчиси Аббосбек Файзуллаев ҳам бор. Умумий рўйхатга легионеримиздан ташқари дарвозабонлар – Игорь Акинфеев,  Владислав Тороп, ҳимоячилар Игорь Дивеев, Данил Круговой, Мойзес, Келлвен, Виллиан Роша, ярим ҳимоячи Иван Обляков ва ҳужумчиТамерлан Мусаев киритилган.

- Сўровномада июлдан декабргача бўлган муддатда ойнинг энг яхши ўйинчиси соврини учун камида икки бор даъвогарлик қилган ўн нафар футболчи номзод сифатида иштирок этади.

Уч босқичда ўтказиладиган сўровномада энг кўп оқоз тўплаган футболчи ЦСКАнинг мавсум биринчи ярмидаги энг яхши ўйинчиси сифатида эътироф этилади.

Сўровнома натижаси Янги йил байрами арафасида – 31 декабрь куни эълон қилинади, - дейилади ЦСКА матбуот хизмати баёнотида.

Аббосбек Файзуллаев мавсум бошидан бери Россия Премьер-лигаси ва мамлакат кубоги мусобақаларида 23 та учрашувда иштирок этиб, учта гол ва олтита ассист муаллифи бўлди.

Эслатиб ўтамиз, 21 ёшли Файзуллаев 2024 йилдаги кўрсаткичларига асосан Осиёнинг энг яхши ёш футболчиси ва Ўзбекистонда йил футболчиси совринлари билан тақдирланди.