Файзуллаев ЦСКАга “янги Месси”ни кашф қилиб кетди
- 27-июл 2025, 22:03
- Zohir Toshxo’jayev
- 1
- Футбол
Аббосбек Файзуллаев 2023 йилнинг августида “Пахтакор”дан ЦСКАга ўтганидан кейин ёрқин ўйинлари билан россиялик мухлису мутахассислар эътиборини қозона олди.
Россия Премьер-лигаси экспертларининг аксарияти таъкидлаганидек, 21 ёшли ўзбек легионери “армиячилар”нинг охирги икки мавсумида ҳужум чизиғи етакчисига айланди. ЦСКАнинг деярли барча ҳужумлари Аббосбек иштирокида ташкил қилинди. Айниқса, Файзуллаевнинг РПЛдаги дебют мавсумида бу яққол кўзга ташланди.
Ўтган мавсум янги бош мураббий Марко Николич Файзуллаевнинг майдондаги позициясини ўзгартириб, уни майдон марказига кўчирди ва ҳужум ташкил қилиш баробарида ҳимояга кўпроқ ёрдам бериш вазифасини юклади. Аббос сербиялик мураббий қўллаган “ромб” услубида энг кўп зиён кўрган ўйинчи бўлди. Николич ўзбек футболчиси янги позицияга кўникиши билан яна голлар ва ассистлар сонини кўпайтиришини таъкидлаганди.
Ёзда Николич ЦСКАни тарк этди. Ҳозир “армиячилар”ни швейцариялик Фабио Челестини бошқармоқда. Бу мутахассисга Аббос билан яқиндан танишиб олиш ва унинг янги қирраларини очиш насиб қилмади. Файзуллаев ЦСКАни тарк этиб, Европани забт этишга отланди.
Москва клубининг коммуникациялар бўйича директори Кирилл Брейдо Аббосбек Файзуллаев Туркиянинг “Истанбул Башакшеҳир” клубида тиббий кўрикдан муваффақиятли ўтганини ва томонлар трансфернинг молиявий кафолатлари бўйича ишларни якунланаётганини расман маълум қилди.
ЦСКА энди Аббосбек Файзуллаевсиз ўйнашни ўрганмоқда. Россия Премьер-лигасининг иккинчи турида “армиячилар” ўз майдонида “Ахмат” клубини қабул қилиб, 2:1 ҳисобида иродали ғалабага эришди.
Учрашувда ҳисобни меҳмон жамоа легионери Брайан Мансилья очган бўлса, Данил Круговой биринчи бўлимга тўхталиш учун қўшиб берилган дақиқаларда иккита тўп киритиб, мағлубиятни ғалабага айлантириб юборди.
Ўйин қаҳрамони бўлган Данил Круговой беллашувдан кейин Аббосбек Файзуллаевнинг унга айтган гапларини мухлислар эътиборига ҳавола этди.
- Аббос кетишидан олдин менга “Энди сен “янги Месси” бўласан, деб айтганди. Балки бу рўёбга чиққан башоратдир, - деди Данил Круговой.
Нуфузли манбаларнинг маълумотига кўра, “Башакшеҳир” Аббосбек Файзуллаев учун ЦСКАга 7,5 миллион евро миқдорида бадал пули тўлайди. Шунингдек, футболчининг натижаларига қараб, 2,5 миллион евро бонус ҳам ажратилиши кўзда тутилган.
Суперлига клуби 21 ёшли ҳужумкор ўйинчининг ўзига 3+1 кўринишида шахсий шартнома таклиф қилди. Айрим манбалар Файзуллаев ушбу битимга кўра, йилига бир миллион евро миқдорида маош олишини хабар қилди.
Эслатиб ўтамиз, ЦСКАда икки йил давомида 72 та учрашувда майдонга тушган Аббосбек Файзуллаев саккизта гол ва 22 та ассист муаллифи бўлди. Ўзбек футболчиси “армиячилар” билан бирга Россия чемпионати бронза медали совриндори, мамлакат кубоги ва суперкубоги соҳиби бўлди.