Файзуллаев трансферида “тўйдан олдин ноғора қоқмайлик”!
- 30-ноябр 2024, 23:01
- Zohir Toshxo’jayev
- 1
- Футбол
Россия Премьер-лигаси ўзбекистонлик футбол ишқибозлари мунтазам кузатиб бораётган чемпионатлардан бири ҳисобланади.
Чунки бу лигада бир неча легионерларимиз тўп тепмоқда. Хусусан, ЦСКА Аббосбек Файзуллаевни, “Рубин” Рустамжон Ашурматов ва Умарали Раҳмоналиевни, “Химки” Алишер Одиловни, “Акрон” Шерзод Эсоновни ўз сафига қўшиб олган.
Умуман олганда, Россия Премьер-лигасида дунёнинг 50 дан ортиқ мамлакатидан 176 нафар ўйинчи тўп тепмоқда. Ўзбекистон бу мусобақадаги легионерлар сони бўйича “топ-10”га киради.
Премьер-лиганинг энг ёрқин ўйинчиларидан бири, шубҳасиз, Аббосбек Файзуллаевдир. 21 ёшли футболчимиз ушбу чемпионатдан Европанинг кучли лигаларига ўтиб кетиш эҳтимоли катта бўлган ўйинчилардан ҳисобланади.
Россиялик журналистлар “Рубин”даги ҳамюртимиз Умарали Раҳмоналиев билан суҳбатда ЦСКА етакчиси Аббосбек Файзуллаев ҳақида ҳам сўради.
— Ҳамюртингиз Аббосбек Файзуллаев ЦСКАнинг асосий юлдузларидан бири. Унинг қисқа фурсатда ўз жамоасининг етакчисига айланганидан ҳайратландингизми?
— Йўқ, ҳайратланмадим. Биз у билан анчадан бери, болаликдан яхши танишмиз. Болалар-ўсмирлар футболида бир биримизга қарши жуда кўп ўйнаганмиз. Кейин терма жамоаларда бирга ўйнадик.
Аббос жуда яхши йигит ва ажойиб техникага эга бўлган кучли футболчи. Буни у ЦСКАда ҳам намойиш қилиб келмоқда. Шунинг учун ҳам унинг муваффақиятлари мени ҳайрон қолдиргани йўқ.
— Кўпчилик, Аббосбек Россия Премьер-лигасида узоқ қолмайди, тез орада Европанинг топ-чемпионатларидан бирига ўтиб кетади, деб ҳисобламоқда. Бу борада сизнинг фикрингиз қандай ва қайси лига унга мос келади?
— Аллоҳ насиб қилса, Файзуллаев ўша лигаларда ўйнайди. Лекин қаерда ўйнашини олдиндан айта олмаймиз. Шу боис, келинг, “тўйдан олдин ноғора қоқмайлик”!
Эслатиб ўтамиз, 21 ёшли Аббосбек Файзуллаев “Пахтакор” тарбияланувчиси ҳисобланади ва 2023 йилнинг августидан бери ЦСКАда тўп тепмоқда. Бир неча позицияда ўйнай оладиган универсал ҳужумкор футболчимиз ҳозиргача “армиячилар” сафида жами 53 та учрашувда иштирок этиб, саккизта гол ва 20 та ассист қайд этган.
Transfermarkt портали Файзуллаевни 6 миллион еврога баҳоланган ва бу рейтинг янгиланса, ҳамюртимизнинг трансфер нархи янада ошиши кутилмоқда.
Умарали Раҳмоналиев эса, “Бунёдкор” клубида тарбияланган. Россияга Файзуллаевдан бир неча ой муқаддам – 2023 йилнинг январида кўчиб ўтган. “Рубин”дан қўним топган ҳамюртимиз Аббосдан фарқли равишда ярим мавсум биринчи лигада ҳам иштирок этган.
Раҳмоналиев қозонликлар сафига қўшилганидан бери барча мусобақаларда 27 маротаба майдонга тушиб, ўз ҳисобига бир жуфт ассист расмийлаштирди. 21 ёшли футболчимиз айни пайтда 600 минг еврога баҳоланяпти.