Файзуллаев трансфери амалга ошадими?
- 18-июл 2025, 06:47
- Zohir Toshxo’jayev
- 2
- Футбол
Ўзбекистон миллий терма жамоаси ва ЦСКА клубининг иқтидорли ҳужумкор футболчиси Аббосбек Файзуллаевнинг келажаги ҳамон мавҳум бўлиб турибди.
Европанинг айрим нуфузли манбалари ва таниқли инсайдерлари 21 ёшли ўзбек футболчиси “Истанбул Башакшеҳир”га кўчиб ўтишини кутмоқда. Хусусан, Туркия чемпионати иқтидорли ўйинчининг Европа топ-лигаларига ўтишида трамплин вазифасини ўташи айтиляпти.
Гарчи “Истанбул Башакшеҳир” матбуот хизмати клуб раҳбарияти Аббосбек Файзуллаев номзодини кўриб чиқмаётганини маълум қилган бўлса-да, Россия футболи экспертлари ўзбек легионерининг трансферини қизғин муҳокама қиляпти.
Sports.uz портали таниқли экспертларнинг Аббосбек Файзуллаевнинг трансфери бўйича фикр-мулоазаларини ўзбекистонлик футбол ишқибозлари эътиборига ҳавола этади. Қизиғи шундаки, бу муносабатларда мутахассислар бир-бирига қарши фикр билдиряпти.
Евгений Алдонин, ЦСКА собиқ футболчиси:
Файзуллаевни айнан мана шу ёзги трансферлар даврида сотиб юбориш ЦСКА учун фойдали вариант бўлади. Файзуллаевнинг Россиядаги дебют мавсуми жуда ёрқин вазиятларга бой бўлди. Лекин ўтган мавсумда Аббос ЦСКАда асосий роллардан четга чиқиб қолди ва кутилган даражада ўйин намойиш қила олмади.
Файзуллаев яхши таълим кўрган ва келажаги бор футболчи. У мунтазам ўйин амалиётига эга бўлиши муҳим аҳамият касб этади. Агар Аббосга яхши шароит ва ЦСКАга яхши сумма таклиф қилинса, бу трансферга розилик бериш керак.
Файзуллаев ҳозир таркибдаги ўрнидан қониқиш ҳосил қилмаётгани аниқ. Чунки жуда кам ўйнаяпти. Марко Николич ўйин схемасини ўзгартириб, Аббосга умуман тўғри келмайдиган усулни қўллади ва Файзуллаев ўз имкониятларидан паст даражада ўйнади.
Файзуллаевнинг жисмонан бақувват футбол эмаслиги унинг доим ўйин тонусида бўлишини талаб этади. Агар бу ҳолат бўлмаса, Аббос яккакурашларда самарали ўйнаши жуда қийин бўлади.
Тимур Лепсая, футбол функционери:
ЦСКАнинг ўрнида бўлганимда Аббосбек Файзуллаевнинг трансфер қилиш учун жаҳон чемпионатини кутган бўлардим. Футболчини яна бир йил қолишга кўндирардим. Аббосбек нархини кескин кўтариши мумкин бўлган мундиалдан кейин бу трансферни қиммат нархга амалга оширса бўлади. Шунинг учун ҳам, бу имкониятларни инобатга олиб, бу трансферни ҳозир тўхтатиб туриш лозим.
“Пахтакор” тарбияланувчиси Аббосбек Файзуллаевни ЦСКА 2023 йилнинг августида ўз сафига қўшиб олган. “Пахтакор” бу трансфердан 500 минг евро олгани қайд этилган.
Аббосбек Файзуллаев легионер сифатидаги дастлабки мавсумидаёқ ўзини кўрсата олди ва Россия Премьер-лигасининг асосий кашфиёти сифатида эътироф этилди. Бундан ташқари, Файзуллаев Осиёнинг энг яхши ёш футболчиси номинациясида ҳам ғолиб чиқди.
Бу йил легионеримиз Россия футболидаги дастлабки совринларини қўлга киритди. Аббос Файзуллаев ЦСКА сафида мамлакат чемпионатининг бронза медалига эга чиқди, кубок ва Суперкубок соҳибига айланди.
Файзуллаев “армиячилар” сафига кўчиб ўтганидан бери барча турнирларда 72 та учрашувда майдонга тушиб, ўз ҳисобига 8 та гол ва 22 та ассист расмийлаштирди.