Файзуллаев кетди!
- 14-феврал 2024, 17:31
- Zohir Toshxo’jayev
- 2
- Футбол
Россия Премьер-лигаси вакили ЦСКА мавсумнинг иккинчи ярмига жиддий тайёргарлик кўрмоқда. Владимир Федотов шогирдлари чемпионатда 18-турдан кейин 28 очко билан саккизинчи ўринни эгаллаб турибди.
ЦСКА футболчилари чемпионатнинг иккинчи қисми олдидан учта хорижий ўқув-машғулот йиғинларида иштирок этиши белгиланган эди. Дастлаб, Бирлашган Араб Амирликларида шуғулланган “армиячилар” иккинчи йиғинни Туркияда ўтказди.
.jpg?1707912871369)
Чемпионат тикланишидан олдин сўнгги машғулотлар 14-24 февраль кунлар яна Белек шаҳрида ташкил этиладиган бўлди.
ЦСКАдаги вакилимиз Аббосбек Файзуллаев дастлабки икки йиғинда иштирок этмади. Ўзбекистон миллий терма жамоаси сафида Қатар мезбонлик қилган Осиё кубогида қатнашган 20 ёшли ҳужумкор футболчимиз расмий мусобақага жалб қилингани боис клуб машғулотларидан озод қилинган.
Аббос Осиё кубогида бешта учрашувда иштирок этиб, ўз ҳисобига иккита гол вабитта ассист ёздириб қўйди ва мусобақанинг энг ёрқин ўйинчиларидан бири сифатида эътироф этилди.
ЦСКА мураббийлар штаби Файзуллаевга бир неча кун таътил берди.
Сўнгги маълумотларга кўра, Аббос таътилни якунлаб, жамоадошлари билан бирга Туркияга жўнаб кетди ва мавсумнинг иккинчи ярмига тайёргарлик кўради. Манбаларнинг келтиришича, “армиячилар” ўқув-машғулот давомида Туркиянинг “Бешиктош “ ва “Анадолу Эфес” каби жамоалари билан ўртоқлик ўйини ўтказади.
Таъкидлаш жоизки, Аббосбек Файзуллаев Россия Премьер-лигасида мавсумнинг биринчи ярмида энг асосий кашфиёт сифатида тан олишди. Ўтган йилнинг августида “Пахтакор”дан ЦСКАга кўчиб ўтган футболчимиз қисқа фурсатда “армиячилар”нинг етакч ўйинчисига айланди.
Файзуллаев Премьер-лига ва мамлакат кубоги доирасида жами 18 та учрашувда қатнашиб, иккита гол ва тўққизта ассист муаллифи бўлди. Унинг трансфер суммаси бир неча баравар кўтарилиб, 4 миллион еврога баҳоланмоқда.
Аксарият мутахассислар легионеримизнинг Осиё кубогида муваффақиятли иштирокини инобатга олиб, трансферларга ихтисослашган transfermarkt.world порталининг навбатдаги янгиланадиган рейтингида янада қимматлашишини таъкидламоқда.
Россия Премьер-лигаси ўйинлари 1 март куни “Ростов” ва “Крилья Советов” учрашуви билан тикланади.
ЦСКА футболчилари 2024 йилдаги илк расмий учрашувини 2 март куни “Оренбург” жамоаси вакилларига қарши ўтказади.
Жорий мавсумда Россия Премьер-лигасида Аббосбек Файзуллаевдан ташқари Рустам Ашурматов ва Умарали Раҳмоналиев “Рубин” жамоаси шарафини ҳимоя қилмоқда. Яна икки легионеримиз – Иброҳимхалил Йўлдошев ва Русланбек Жиянов қишки трансферлар вақтида “Нижний Новгород” жамоасини тарк этди.
Мавсумнинг қолган қисмига пухта тайёргарлик кўраётган “Рубин” жамоаси янги йилдаги биринчи беллашувини 2 март куни мусобақа пешқадами “Кранодар” майдонида ўтказади.