Файзуллаев Ҳусанов ортидан қайси футболчи “Манчестер Сити”га бора олишини айтди!
- 31-май 2025, 10:09
- Zohir Toshxo’jayev
- 1
- Футбол
Абдуқодир Ҳусанов айни пайтда нафақат Ўзбекистон, балки қўшни мамлакатлар ва ҳатто МДҲ давлатларида ҳам энг таниқли футболчилардан бирига айланиб улгурди.
Табиийки, бу ўзбек футболчисини қишки трансферлар вақтида Франциянинг “Ланс” клубидан “Манчестер Сити”га кўчиб ўтгани сабаб. Хосеп Гвардиола бошқарувидаги “шаҳарликлар” бутун дунё бўйлаб миллионлаб мухлисларга эга жамоа ҳисобланади.
Гарчи бу трансфер бошида кутилмагандек туюлган бўлса-да, Абдуқодир Ҳусанов энг мураккаб турнир – Англия Премьер-лигасида ҳам ўйнай олишини кўрсатди.
Февраль ойида жамоасининг энг зўр футболчиси сифатида эътироф этилган легионеримизнинг кейинчалик майдонга туширилмагани унинг ўйин даражаси билан боғлиқ эмаслиги, клуб францияликларга қўшича бонуслар тўламаслик учун Ҳусановни захирада олиб ўтиргани ошкор бўлди.
Россия футболини ёритиб келаётган sport24.ru сайти вакиллари ЦСКА футболчиси Аббосбек Файзуллаевдан россиялик футболчлардан қай бири Абдуқодир Ҳусановнинг ортидан бора олишини сўради.
- Россиялик футболчилардан қай бири “Манчестер Сити”га йўл олган Абдуқодирнинг йўлини такрорлаши мумкин? Матвей Кисляк. У мавсумнинг иккинчи қисмини жуда яхши ўтказди. Кислякда Европа клубларига ўтиш учун жуда яхши сифатлар мужассам.
Шахсан мен Матвейни Европанинг ҳар қандай топ-клубида кўришни истайман, - деди Аббосбек Файзуллаев.
Марказий ярим ҳимоячи позициясида ҳаракат қиладиган 19 ёшли Матвей Кисляк ЦСКА тарбияланувчиси ҳисобланади. Истеъдодли футболчи бир ярим мавсумдан бери “армиячилар”нинг асосий жамоасида тўп тепиб келмоқда.
Бу мавсум Кисляк Премьер-лига ва мамлакат кубоги баҳсларида жами 32 та учрашувда иштирок этиб, тўртта гол ва битта ассист муаллифи бўлди.
Эслатиб ўтамиз, Аббосбек Файзуллаев 2023 йилнинг августида “Пахтакор”дан ЦСКАга кўчиб ўтганидан бери москваликлар сафида барча турнирларда 70 маротаба майдонга тушиб, ўз ҳисобига 8 та гол ва 22 та ассист расмийлаштирган.
Россия Премьер-лигасини учинчи ўринда якунлаган ЦСКА айни пайтда мавсумнинг энг муҳим учрашувига тайёргарлик кўрмоқда. “Армиячилар” 1 июнь куни Россия кубогининг Суперфиналида “Ростов” жамоаси билан рақобатлашади.
Агар бу беллашувда пойтахтликлар ғолиб чиқса, Аббосбек Файзуллаев ЦСКА билан илк нуфузли совринини қўлга киритади.
Суперфиналдан кейин 21 ёшли ҳужумкор футболчимиз Бирлашган Араб Амирликларига йўл олиб, Ўзбекистон миллий терма жамоаси сафида 2026 йилги жаҳон чемпионати саралаш турнирининг охирги икки ўйинига тайёргарлик кўради.