Файзуллаев Ҳусанов муҳим воқеага сабабчи бўлганини айтди!
- 14-феврал 2025, 07:42
- Ali Ahmadxo’jayev
- 0
- Футбол
Кейинги йилларда ўзбек футболидан етишиб чиққан ёш истеъдод эгалари орасида энг ёрқин номлар, шубҳасиз, Аббосбек Файзуллаев ва Абдуқодир Ҳусанов ҳисобланади.
Бу икки футболчи халқаро миқёсидаги фаолияти давомида Ўзбекистоннинг турли ёшдаги терма жамоаларида бирга ўйнаб келди ва айни пайтда миллий жамоанинг етакчиларига айланган. Ҳар иккимининг мақсади Ўзбекистонни тарихда илк бор жаҳон чемпионатига олиб чиқишдан иборат.
Айнан Аббос ва Абдуқодир Ўзбекистон U-23 терма жамоасининг Осиё чемпионатида финалга чиқиб, Париж Олимпиадасига йўлланма олишига катта ҳисса қўшган эди. Ўтган ёз футболчиларимиз Олимпия ўйинларида иштирок этгани тарихий воқеа сифатида қайд этилди. Энди навбат – жаҳон чемпионатига!
Бу икки ёш талантлар фаолиятини кузатар эканмиз, қизиқ ҳолатга гувоҳ бўламиз. Аббосбек Файзуллаев 2023 йилнинг ёзида “Пахтакор”дан ЦСКАга кўчиб ўтгани ва Россия Премьер-лигасида бирданига порлаганидан кейин ҳужумкор футболчимизнинг Европага кетиши ҳақида жуда маълумотлар чиқарилди.
Хусусан, Аббосга “Бавария”, “Парма”, “Вильярреал”, “Монако” каби бир неча клублар қизиқаётгани кўп бор ёритилди. Бироқ бирорта вазиятда иш амалий таклиф ва расмий музокарагача етиб бормади. Файзуллаевнинг Европага кетиши ҳамон энг кўп муҳокама қилинаётган мавзулардан бири бўлиб қолмоқда.
Бу борада Абдуқодирнинг фаолиятида жуда тез ижобий ўзгаришлар юз бермоқда. “Энергетик-БГУ”да профессионал даражада бир йил ўйнаган Ҳусанов 2023 йилнинг ёзида кутилмаганда Франциянинг ўша пайтдаги вице-чемпиони “Ланс”да пайдо бўлди. Кучли бешлик лигаларидаги бу жамоага 19 ёшида қўшилган ҳимоячига Европада ном қозониши учун бир ярим мавсум кифоя қилди.
Йигирмага яқин қудратли клублар даъвогарлик қилган Ҳусановни “Манчестер Сити” қўлга кирита олди.
Аббосбек Файзуллаев дўсти Абдуқодирнинг жаҳоннинг энг зўр клубларидан бирига кўчиб ўтганига қуйидагича муносабат билдирди.
- Абдуқодир Ҳусанов билан “Манчестер Сити”га ўтишидан олдин гаплашган эдик. Бу трансфер бутун Ўзбекистон футболи, ўзбек халқи учун улкан ва муҳим воқеа бўлди.
Дунёнинг энг зўр клубларидан ҳисобланган “Манчестер Сити” учун ўйнаш – жуда катта иш.
Ҳаммамиз Абдуқодирдан фахрланамиз, унинг ўйинларини ҳаяжон билан кузатиб боряпмиз.
Ўзим дўстим “Сити” учун илк голини урган ўйинни томоша қилдим. Бутун Ўзбекистон унга мухлислик қиляпти. Энди “Манчестер Сити”нинг мухлислари сони кескин ошиб кетгани аниқ, - деди Аббосбек Файзуллаев.
Айрим экспертлар Ҳусановнинг “Манчестер Сити”га трансфери Европа клубларининг ўзбек футболига кўпроқ эътибор қаратишига хизмат қилишини таъкидламоқда. Шундай экан, бошқа футболчиларимиз, хусусан, Аббосбек Файзуллаевнинг ҳам дўсти Абдуқодир ортидан “кўҳна қитъа”нинг кучли лигаларига кўчиб ўтишини кутиб қоламиз.