Файзуллаев Европанинг топ-клубида ўйнаши мумкин!
- 21-май 2024, 20:00
- Zohir Toshxo’jayev
- 2
- Футбол
Тез орада ёзги трансфер ойнаси очилиб, клублари ўз таркибиларини тартибга солишни бошлайди.
Ўзбекистоннинг турли терма жамоалари халқаро миқёсдаги мусобақаларда муваффақиятли қатнашаётгани боис ўзбек футболчиларига ҳам кучли лигалардан чорлов бўлиш эҳтимоли катта.
Айниқса, 23 ёшгача бўлган футболчиларимиз Олимпия ўйинларига йўлланма олгани ҳамюртларимизга ўз истеъдодларини жаҳон миқёсида намойиш этиш учун яхши имкониятҳисобланади. Чунки ёзда Париж шаҳри мезбонлик қиладиган ўйинларни кўплаб жамоаларнинг скаутлари кузатиб бориши ҳеч кимга сир эмас.
Европага боришни кўзлаётганлардан бири Аббосбек Файзуллаевдир. Нафақат ўзбекистонлик, балки россиялик экспертлар, журналистлар ва мухлисларни ҳам 20 ёшли легионеримизнинг фаолияти қизиқтириб қўйган.
Россия футболини ёритишҳб келаётган championat.com сайти журналисти Владислав Круглов Премьер-лигада “Рубин” шарафини ҳимоя қилаётган ҳамюртимиз Умарали Раҳмоналиев билан суҳбатда ЦСКА ҳужумкор футболчиси Аббосбек Файзуллаевнинг имкониятларига баҳо беришни сўради.
- Аббосбек Файзуллаев зўр футболчи бўлиб етишиши ва Европанинг топ-клубида ўйнай олишига юз фоиз ишонаман.
Мен хорижда тўп тепаётган ҳар қайси ўзбек футболчиси ҳамма ерда ўйнай олади, деб ўйлайман. Бунинг учун ўзига ишониб, меҳнат қилишда давом этиш зарур.
Аббос – ажойиб йигит ва зўр футболчи, - деди Умарали Раҳмоналиев.
Умарали Аббосбекнинг имкониятлари яхши билади. Чунки бу икки йигит ўтган йили 20 ёшгача бўлган футболчилар ўртасидаги Осиё чемпионатида Ўзбекистон терма жамоасининг ғолиб чиқишига катта ҳисса қўшди, Аргентина мезбонлик қилган жаҳон чемпионатида ҳам елкама-елка ўйнади.
Қоларвеса, ҳар иккиси яқинда Ўзбекистон U-23 терма жамоасининг Қатардаги Осиё кубогида муваффақиятли қатнашиб, ўзбек футболи тарихида илк бор Олимпия ўйинлари йўлланмасини қўлга киритишига ёрдам берди.
Энди Россия Премьер-лигасида тажриба ошириб, маҳоратини чарҳлаётган Аббос ва Умарали ёзда Франция пойтахти Париж шаҳри мезбонлик қиладиган тўрт йилликнинг энг нуфузли мусобақасида юртимиз шарафини ҳимоя қилади.