Фаолиятини қайта тиклаган "Металлург" олдида қандай муаммолар турибди?
- 31-январ, 00:30
- Shuhratbek Jo’rayev
- 0
- Футбол
Куни кеча ўз фаолиятини қайта тиклаган Бекободнинг "Металлург" клуби олдида бир қатор муаммолар турибди. Бу ҳақида ЎзПФЛ матбуот хизмати шундай баён қилади:
"Металлург" клуби 2024 йилги мавсум сўнгида Суперлигадан четлаштирилган бўлиб, кейинчалик у Лига томонидан ўтказиладиган бошқа мусобақаларда иштирок этмади.
“Ўзметкомбинат” АЖ бошқаруви раиси — бош директор Баҳодир Абдуллаев томонидан ёзилган кафолат хати асосида "Металлург" 2026 йилдан эътиборан Лига мусобақаларига қайтди. Бироқ унинг айнан қайси мусобақада иштирок этиши масаласи юзасидан ўрганиш ишлари амалга оширилмоқда.
Маълумки, "Металлург" клубида Про лига талабини бажариш учун инфратузилма ва шароит мавжуд. Бироқ ўртада юзага келган танаффус сабабли, Лига клуб билан боғлиқ фаолиятни қайта мониторинг қилиб бормоқда. Клубнинг ягона иштирокчиси бўлган “Ўзметкомбинат” АЖ томонидан 23 январь куни чиқарилган қарорга асосан, Улуғбек Мирзаев "Металлург" клуби бош директори этиб тайинланди. Кейинги қадам сифатида клуб янги футболчиларни рўйхатдан ўтказиш учун MyLeague платформасига қайта уланиши лозим.
ФИФА томонидан назорат қилинадиган футболчиларни рўйхатдан ўтказиш даври Ўзбекистонда 23 февраль куни якунланади. Бироқ 2024 йилдан эътиборан ФИФА клубга янги футболчиларни рўйхатдан ўтказиш учун тақиқ қўйган бўлиб, бунга сабаб бўлган қарздорлик тўлиқ бартараф қилинмагунига қадар, клуб янги меҳнат шартномаларини тегишли платформага юклай олмайди.
Лига талаби билан "Металлург" ФИФА TMS ва Legal Portal платформаларидан фойдаланиш имкониятини қайта тиклаган бўлиб, айни вақтда клуб раҳбарияти эски қарздорликни бартараф этиш устида ишламоқда. Собиқ легионер футболчининг тасдиғи асосида ФИФА "Металлург" клубидан трансфер тақиқини олиб ташласа, Лига "Металлург" билан меҳнат шартномаси имзолаган футболчиларни рўйхатга олишни бошлайди.
Шу йилнинг 23 январь куни Лига ишчи гуруҳи Бекобод шаҳрида бўлиб, "Металлург" стадионидаги ҳолат билан танишди. Мазкур арена 2023 йил якунлари бўйича мониторинг хулосалари асосида Лига томонидан Суперлига мусобақаси учун қабул қилинмаганди. Бироқ унда Про лигани ўтказиш имконияти мавжуд. Бунинг учун майдон парвариши ва уни жонлантириш ишлари ҳозирдан бошланиши лозим. Айни вақтда клуб раҳбарияти майдон парвариши ва стадион техник зоналарини пардозлаш ишлари учун смета харажатларини ишлаб чиқмоқда. “Ўзметкомбинат” АЖ бунинг учун маблағ ажратишни назарда тутган бўлиб, тез орада майдонни жонлантириш ишлари бошланади.
Юқоридаги масалалар кетма-кетликда амалга оширилса ҳамда клуб қошидаги академиянинг барча тарбияланувчилари MyLeague платформасидан тегишли тартибда рўйхатдан ўтказилса, "Металлург" фаолиятини Про лигада давом эттириши мумкин", - дейилади Лиганинг расмий хабарида.