Европада ҳозирча карантин! Биз эса энг тезкор голларни ёдга оламиз

Футбол бошланганидан 10 дақиқа ўтгач ҳам стадионга келадиган томошабинлар бор. Одатда, бундай томошабинлар жуда ҳам аҳамиятли вазиятларни ўтказиб юборишмайди. Чунки футболчилар дастлабки дақиқаларда голлар уришмайди.

Лекин баъзан илк дақиқадан эмас, илк сонияларданоқ голлар урилганини кўриш мумкин. Мана шундай вазиятларда эса кечиккан мухлислар муҳим нарсаларни ўтказиб юбориши мумкин. Коронавирус туфайли ҳозир Европа чемпионатлари тўхтатилган бир пайтда, биз сиз билан футболдаги энг тезкор голларни ёдга оламиз.

Футбол тарихидаги энг тезкор гол

Гол муаллифи: Демиан Мур

Вақти: учинчи сония

Жамоа (чемпионат), йили: “Аделаида Сити” (Австралия чемпионати), 1995 йилда урилган бу гол Гиннеснинг рекордлар китобига киритилган. Мур ўйин бошлангандан сўнг, учинчи сонияда “Сидней Юнайтед” дарвозасига гол урганди. “Аделаида Сити” футболчилари ўйинни бошлашди ва Мур зудлик билан зарба берди ва рақиб дарвозабони бунга тайёр бўлмагани учун голни ўтказиб юборди. Голнинг дарвозадан ўрин олишигача кетган вақт 3,69 сонияни ташкил этади. Гол урилганига 25 йил бўлган бўлса-да, ҳали-ҳамон футбол тарихидаги энг тезкор гол ҳисобланади.

Терма жамоалардаги энг тезкор гол

Гол муаллифи: Лукас Подольски

Вақти: олтинчи сония

Терма жамоа, йили: Германия, 2013

Германия ва Эквадор терма жамоалари ўртасидаги ўртоқлик ўйинида Лукас рақиб футболчисидан тўпни олиб қўйди ва дарвозабон билан бирга-бир вазиятга чиқиб, гол урди. Юрген Клопп бу голга “Жуда тез ва жозибали” дея таъриф берган эди.

Чемпионлар Лигаси финалларидаги энг тезкор гол

Гол муаллифи: Паоло Мальдини

Вақти: 53 сония

Жамоа, йили: “Милан”, 2005

2005 йилдаги финал ҳамманинг ёдида қолган. Мальдини учун эса ўша финал алоҳида аҳамият касб этади. Паоло ўша ўйиндаги голи туфайли Чемпионлар Лигаси финаллари тарихидаги энг тезкор гол муаллифига айланган.  “Милан” ҳимоячиси 53 сониядаёқ ҳисобни очганди. Миланлик мухлислар бу ўйинни ўз хотираларидан мажбурлаб ўчириб юборишни хоҳлашади, аммо Мальдинининг голи бунга йўл қўймайди.

АПЛдаги энг тезкор гол

Гол муаллифи: Шейн Лонг

Вақти: еттинчи сония

Жамоа, йили: “Саутгемптон”, 2019

2001 йилда “Тоттенхэм” футболчиси Ледли Кинг томонидан урилган гол деярли 20 йил давомида АПЛ тарихидаги энг тезкор гол бўлиб келди. Кинг 9 сонияда гол урганди. Бу АПЛдаги дастлабки 10 сонияликда урилган ягона гол эди. 2019 йил апрель ойида ҳаммаси ўзгарди. “Саутгемптон” ҳужумчиси Шейн Лонг “Уотфорд”га қарши ўйинда 7 сонияда ҳисобни очди. Ўша ўйинда “Саутгемптон” ғалаба қозона олмади, аммо Лонг тарихда қолди.

АҚШ чемпионатидаги энг тезкор гол

Гол муаллифи: Майк Грелла

Вақти: еттинчи сония

Жамоа, йили: “Нью-Йорк Ред Булл”, 2016

“Нью-Йорк Ред Булл” жамоаси футболчиси Майк Грела еттинчи сонияда “Филадельфия” дарвозасини ишғол қилди. Рақибининг хатосидан сўнг тўпни олиб қўйди ва рикошет орқали тўпни дарвозага жойлади. Бу воқеа 2016 йилда юз берди. МЛСда бундан аввалги реcорд ҳам “Нью-Йорк Ред Булл” жамоасининг бошқа бир футболчисига тегишли эди. Тим Кэхилл 2013 йилда саккизинчи сонияда рақиб дарвозасини ишғол этганди. Майк эса бу рекордни янгилаган.