Еврокубокда ўйнайдиган клуб ўзбек футболчиси трансферини эълон қилди
- 5-апрел, 11:12
- Zohir Toshxo’jayev
- 0
- Футбол
Қозоғистон Премьер-лигасининг энг кучли жамоаларидан ҳисобланган “Астана” ўзбекистонлик футболчи трансферини расман эълон қилди.
Ўзбекистон ёшлар терма жамоаси ва “Ғазалкент” клуби ярим ҳимоячиси Асилбек Абдурасулов ижара асосида “Астана” жамоасига ўтди.
- Асилбек Абдурасулов — “Астана”нинг янги ўйинчиси!
Ёш ўзбек ярим ҳимоячиси жамоага йил охиригача ижара асосида қўшилди. Асилбек қанот ҳужумчиси позициясида ўйнайди, — дейилади пойтахт жамоасининг Instagram саҳифасида эълон қилинган баёнотида.
18 ёшли ўзбекистонлик футболчи аслила “Бунёдкор” тарбияланувчиси ҳисобланади. У жорий йилнинг февраль ойида “Ғазалкент”га трансфер қилинган эди. Асилбек Ўзбекистон ёшлар терма жамоаси сафида икки ўйинда майдонга тушган.
Қозоғистон Премьер-лигасининг 2026 йилги мавсумида дастлабки уч турида “Астана” икки ғалаба ва бир дуранг қайд этди. Пойтахт жамоаси 7 очко билан турнир жадвалида биринчи ўринни эгаллаб турибди.
Ўтган мавсумда чемпионатни иккинчи ўринда якунлаган “Астана” бу йил УЕФА Конференциялар лигасининг саралаш босқичида иштирок этади.
Шу ўринда, Қозоғистоннинг яна бир жамоаси “Окжетпес” ўзбекистонлик ярим ҳимоячи Бектемир Абдуманнонов билан шартнома имзолаганини маълум қилди.
- Бектемир Абдуманнонов — “Окжетпес” ўйинчиси!
“Окжетпес” футбол клуби ўзбек ярим ҳимоячиси Бектемир Абдуманнонов билан шартнома имзолади.
Бектемир 2002 йилнинг 12 июлида туғилган. У Тошкентнинг “Пахтакор” клуби тарбияланувчиси ҳисобланади. Ўзбекистон чемпионатида 93 та ўйин ўтказиб, 14 та гол урган ва 19 та голли узатма берган. “Андижон” таркибида Ўзбекистон кубоги соҳиби бўлган, — дейилади Кокшетау шаҳри шарафини ҳимоя қилаётган жамоа Instagram саҳифасида.
23 ёшли вингер 2024 йилда “Андижон” таркибида Ўзбекистон кубоги соҳиби бўлган эди. Бектемир 2026 йилнинг 19 январь куни Самарқанднинг “Динамо” клубига ўтган. У ярим мавсумга ижара асосида “Окжетпес” сафида тўп тепадиган бўлди.
Шу билан бирга Самарқанд клуби ёзги трансфер ойнасида футболчини қайтариб олиш ҳуқуқини сақлаб қолган.
Таъкидлаш жоизки, қисқа танаффусдан кейин Қозоғистон чемпионатида яна ўзбекистонлик футболчилар пайдо бўлди.
Одил Аҳмедов билан ўйнаган юлдуз футболдан йиғлатадиган гапларни айтиб кетди
Кульминацион нуқта – Ҳусанов Салоҳ ҳисобни очишга йўл қўймагани бўлди
Бунақа ўйиндан кейин экспертлар Ҳусановнинг рейтингини кўтарди!
Олмалиқда туғилган футболчи трансферини Манчестер ва Мадрид суперклублари сўради