Энг кучли атлетларимиз баҳсга киришди

Пойтахтимиздаги Ўзбекистон енгил атлетика федерацияси стадионида енгил атлетика бўйича катталар ва 20 ёшгача бўлган атлетлар орасида Ўзбекистон чемпионати бўлиб ўтмоқда.

Мусобақанинг 400 метрга тўсиқлар оша югуриш баҳсларида Нурхон Очилова ҳамда Муҳаммадсодиқ Каримов катталар орасида, Паризода Тўраева, Ҳасанбек Рустамжонов U20 ёш тоифасида олтин медални қўлга киритди.

10 минг метрга спортча юриш беллашувларида Диана Яфасова ҳамда Карина Ткачик (U20) олтин медалга сазовор бўлди.  

Лангар чўпга таяниб сакрашда Матлуба Саидаҳмедова ҳамда Нодир Норбоев катталар ўртасида тенгсиз эканини исботлади. U20 тоифасида Дадархон Ибрагимова ҳамда Шаҳзодбек Холмуродов энг яхши натижа қайд этди. Уч ҳатлаб сакрашда Роксана Худоёрова, Иброҳим Маҳкамов (катталар), Заҳро Турсунова ҳамда Максим Селезнев (U20) мамлакат чемпионига айланди.

Диск улоқтиришда Юлианна Шукина (катталар), Маҳлиё Каримова, Абдуазим Раҳматуллаев (U20) шоҳсупанинг энг юқори поғонасидан жой олди.

Найза улоқтиришда эса Наргиза Қўчқорова ҳамда Сарвар Исмоилов катталар тоифасида биринчи поғонадан ўрин эгаллаган бўлса, U20 да Шаҳина Йигиталиева ва Абдували Солоев барча рақибларидан ўзиб кетди. Ўнкураш беллашувларида Баҳриддин Шарипов 5068, Абдуллоҳ Абдуқаҳҳоров 5571 очко билан ўз ёш тоифаларида олтин медалга эга чиқди.