Даврон Файзиев: Саудияликлар Кўрфаз кубогида? Бу биз нима қиламиз? дейдиган даражада жиддий муаммо эмас

Ўзбекистон миллий терма жамоаси ЖЧ-2022 иккинчи саралаш босқичида Саудия Арабистонига имкониятни бой бериб қўйди.

Учрашув олдидан Қатарда фаолият юритаётган ҳамюртимиз Алишер Никимбаев SPORTS.uz сайтига интервью бериб, вакилларимиз ғалаба қозонишларини айтиб ўтганди. Тахминлари ўзини оқламагач Никимбаев телеграм каналидаги саҳифасида мураббийни танқид қилди. Шунингдек, мутахассис терма жамоанинг ўйини кучайишида қандай режалар борлигини мутасаддилардан сўраб қолганди.

“SPORTS.uz ҳафтаси” кўрсатувида ЎФА матбуот хизмати раҳбари Даврон Файзиев ушбу мурожаатга ва Никимбаевнинг фикрларига жавоб берди.

- Алишер Никимбаев кучли мутахассис. Ўзининг шахсий фикрлари, қарашлари бор. Аммо билишим бўйича Никимбаевда Абрамовни ўзгина бўлса ҳам ёқтирмаслик кайфияти бор, деб ўйлайман. Шу нарса ҳам жамоа ҳақида фикр шаклланишига таъсир қилиши мумкин. Чунки Никимбаев айтдику “жамоа вақтли йиғилди, шу пайт нима қилди, ўзи нима керак 12 кун олдин йиғилиб, мана бошқа жамоалар 3-4 кун олдин жамланиб ўйнамоқдаку” деди. Бундан келиб чиқадики, баҳордаги ўйингача ҳеч нарса қилмай, учрашувга 3-4 кун қолганда йиғилиб ўйнасак бўлади. Кўрфаз кубоги бу Саудиянинг омади. Ушбу мусобақа шундай пайтга тўғри келди. Улар тайёрланиб олишади, бу плюс. Лекин шундан кейин жамоа очко йўқотиб қўйса, унга бу турнирда нима қилди? деб савол берилмайдику. Бу мусобақанинг мартдаги учрашувларга умуман алоқаси йўқ. Чунки жамоа у пайтгача бошқача форма ва таркибда бўлиши мумкин. Айтмоқчиманки, баҳордаги ўйинларимизга ноябрь – декабрь ойларидаги воқеалар чамбарчас боғлиқ эмас. Саудияда ҳам ҳудди шундай. У пайтда нима бўлишини ҳеч ким билмайди. Саудиянинг ишлаш услубидан келиб чиқадиган бўлсак, улар Кўрфаз кубогидаги ҳамма баҳсларда мағлубиятга учрашса, Эрве Ренарни ишдан олиб ташлашлари мумкин.

Шунинг учун саудияликлар Кўрфаз кубогида кейинги турларга яхшироқ тайёрланади. Бизда эса ўша пайт бундай турниримиз йўқ. Биз нима қиламиз? деган даражада жиддий муаммо эмас.

Бизда менимча, январда йиғилиб, жамоанинг ритмини ушлаб қолиш учун балки бир ёки иккита ўртоқлик ўйини ўтказилар. Бу ҳали аниқ эмас. Мантиқан олиб қараганда, шундай. Қолаверса, март ойидаги ЖЧ саралашидан аввал битта назорат баҳси ўтказилса керак. Шу бизнинг тайёргарлик. Қайси бири тўғри: йиғин аввалроқ ташкил этиб, жиддий тайёрланишми ёки 3-4 кун олдин йиғилиб шунчаки ўйнаб кетишми? Буни энди мутахассислар бор, улар таҳлил қилишмоқда. Шахсий фикримча, ФИФА кунлари агар имконият бўлса сал аввал йиғилиб, битта ўртоқлик ўйини ўтказиб, расмий учрашувга етиб олиш яхши. Лекин 4 кун аввал жам бўлиб расмий ўйин ўтказиш ҳам фожеа эмас, - деди Даврон Файзиев.