Дамир Темиров: "Чемпион бўлишимиз ҳам ҳеч гап эмас"

Маълумки, “Андижон” Анталияда янги мавсум учун ўқув-машғулот йиғинини олиб бормоқда. Таркиб ҳам шакллантирилмоқда. Яқинда истеъдодли ярим ҳимоячи Дамир Темиров билан шартнома имзоланганлиги хусусида хабар бериб ўтдик.

Ўтган йили иккинчи даврада жамоага қўшилган футболчи ўзидан илиқ таассурот қолдирди. Мухлислар меҳрини ҳам қозонди. Ўшанда у “Динамо”дан ижарага келганди. Эндиликда эса Темиров янги мавсумда тўлақонли равишда “Андижон” футболчисига айланди.

Футболчи “Бургутлар” билан бирга Анталиядаги йиғинда фаол иштирок этмоқда. Клуб матбуот хизмати эса мазкур ўйинчи билан айрим масалаларда суҳбатлашди.

- Дамир янги мавсумда сиз энди тўлақонли равишда "Андижон" аъзосига айландингиз. Ўтган йили ижара ҳисобида ўйнагансиз. Бу йил яна "Андижон"га қайтишингизни асосий сабаблари нима билан боғлиқ бўлди?

- “Андижон”га қайтиб келишимни асосий сабаби, бу - мураббий ва албатта клубнинг ўз олдига қўйган мақсадларидир.

- Жамоа билан Анталия йиғинида қатнашяпсиз. Бу ердаги машғулотлар қандай кечяпти ва ўзингизни қандай ҳис қиляпсиз?

- Айтишим жоизки, машғулотлар аъло даражада ва бу ерда ўзимни жуда яхши ҳис қиляпман.

- Сиз ўйнайдиган позицияда ўзингиз учун қайси футболчини намуна қилиб кўрсата оласиз?

- Жамоамда бу - Искандар Шойқулов, Европада эса албатта Кевин Де Брюйне.

- Биласиз, “Андижон” илк бор ОЧЛда қатнашади ва бундай имконият сизда ҳам илк бор амалга ошади. "Бургутлар"ни ушбу турнирда имкониятини қандай баҳолайсиз?

- Ўз олдимга ҳар доим максимал вазифа қўяман. Ниятни тўғри қилсак, Худо хоҳласа чемпион бўлишимиз ҳам ҳеч гап эмас.

- "Андижон"даги ярим мавсумлик фаолиятингиз унутилмас бўлди, Кубок қўлга киритилди. Шундай экан, сиз келганингизда нимани истагандингиз?

- Аллоҳдан қирдай сўрасанг, тоғдек беради, дегани рост экан. Албатта, кўпроқ ўйин амалиётига эга бўлишни учун ҳам келган эдим. Ҳаммаси жуда ажойиб кечмоқда.

- Анталиядаги йиғин жуда муҳим. Доим йилнинг шу вақтида клубларимиз шу ерга келишади. Сизга энг кўп ёқадигани нима?

-  Менга ёқадиган нарса бу - иқлим, майдон ва яхши спарринг-рақиблар.