Бунча маошни ташлаб, “Реал”дан кетолмайман!

Кейинги мавсумларда кўп жароҳатланаётган австриялик марказий ҳимоячи Давид Алаба “Реал”га  ўйинларда етарли даражада ёрдам бера олмаяпти.

Янги бош мураббий Хаби Алонсо ҳам 33 ёшли футболчини келажак режаларига киритмоқчи эмас. Шу боис, клуб раҳбарияти яна бир йиллик шартномаси қолган Алабага ҳамкорликни ўзаро келишган ҳолда ҳозирдан бекор қилишни таклиф этди.

AS нашрининг маълум қилишича, тажрибали ҳимоячи клуб таклифини рад этган. Алаба жамоадан кетмоқчи эмас. Шунга мажбур бўлган тақдирда битимининг охирги муддатидаги тўланиши керак бўлган маоши берилишини сўраяпти.

Давид Алаба “Қироллик клуби”да маошининг катталиги бўйича иккинчи ўринда туради. Унинг йиллик оклади 22,5 миллион еврони ташкил қилади.

Алаба “Реал”га 2021 йилнинг ёзида “Бавария”дан олиб келинган. Шу пайтга қадар барча турнирларда 116 та учрашувда қатнашиб, ҳимоядаги вазифаларини бажаришдан ташқари бешта гол ва тўққизта ассист қайд этди.