Бугун қўшни Қозоғистон билан ўйнаймиз. Рақиб ҳақида билишингиз керак бўлган барча маълумотларни тақдим этамиз

Бугун Ўзбекистон миллий терма жамоаси Қозоғистон термасига қарши баҳс олиб борадиган бўлди. Ўйин 18:00 да Тошкентдаги "Пахтакор" ўйингоҳида старт олади. 

Рақиб айни пайтда Европада ҳам кўпчиликнинг эътиборига тушган. Мазкур ўртоқлик учрашувига қизиқиш юқори бўлгани сабаб SPORTS.uz сайти журналисти Шоҳрух Зоиров Қозоғистон терма жамоаси ҳақида батафсил тўхталиб ўтишга қарор қилди. 

Умумий маълумот.

Қозоғистон Футбол Федерацияси 1994 йилдан 2002 йилга қадар ОФК аъзоси сифатида қайд этиб келинган. Бироқ 2002 йилдан ҳозиргача терма жамоа УЕФА таъсири остидаги турнирларда қатнашиб келади. Яъни 20 йил олдин қўшниларимиз ОФКни УЕФАга "алмаштирган". "Лочинлар" худди биз каби Жаҳон чемпионатида иштирок этиш бахтига муяссар бўлмаган. 2002 йилда УЕФАга кўчиб ўтган бўлса-да, терма жамоа Европа чемпионатларида ҳам кўриниш бермаган. 

Қозоғистонликлар илк расмий ўйинини ўртоқлик учрашуви доирасида Туркманистонга қарши ўтказган. Олма-отада кечган баҳс мезбонларнинг кичик 1:0 ҳисобидаги ғалабаси билан якун топган. Энг йирик ғалаба Покистонга қарши ўйинда қайд этилган. 1997 йил 11 июнда қўшниларимиз рақиби дарвозасига оз эмас, кўп эмас нақ 7 та жавобсиз тўп киритган. Энг йирик мағлубиятни қозоғистонликлар 2021 йилда Франция терма жамоасидан қабул қилиб олган - 0:8. 

Терма жамоа Нур-Султондаги "Астана Арена"да ўз уй учрашувларини ўтказади. Ушбу ўйингоҳ ўз бағрига 30 минг томошабинни сиғдира олади. 

Рақибларимизнинг ФИФА рейтингидаги энг яхши натижаси 2016 йил сентябрь ойига тўғри келади. Ўшанда улар жаҳон таснифи бўйича 83-ўринда эътироф этилган. Энг ёмон натижа 1996 йил май ойида қайд этилган. Шу йили жамоа 166-поғонадан ўрин эгаллаган. Айни пайтда қўшниларимиз рейтингда 113-ўринни банд этиб турибди. Таққослаш учун, Ўзбекистон терма жамоаси худди шу рейтингда 77-ўринни эгаллаган.

Қайд этаётган натижалари.

"Лочинлар" охирги 6 ўйинида 4 ғалаба, 1 дуранг ва 1 мағлубият қайд этган. Таслим этилган жамоалар орасида Озарбайжон, Беларус ва Словакия терма жамоаларининг номини кўришимиз мумкин. Энг сўнгги баҳсда Озарбайжон термаси Нур-Султондаги мағлубият учун "қасос" олган - 3:0. 

Миллатлар лигасида мазкур жамоаларга қарши кураш олиб борган Магомед Адиев шогирдлари якунда гуруҳ етакчиси сифатида бир поғона юқоридаги "B" лигага йўлланма олди. 

Шунингдек, Евро-2024 саралаш босқичига қуръа ташлаш маросими қозоғистонликлар тўртинчи саватчадан ўрин олди. Ушбу саватчада қўшниларимиз билан бир қаторда Грузия, Греция, Туркия, Озарбайжон ва Шимолий Македония термалари жой олган эди.

Қуръа натижаларига кўра, Қозоғистон "H" гуруҳидан ўрин олди. Унда бўлажак рақибларимизга Дания, Финляндия, Словения, Шимолий Македония ва Сан-Марино жамоалари рақиблик қилади.

Мураббий ҳақида. 

Терма жамоа бош мураббийи россиялик мутахассис Магомед Адиев ҳисобланади. У 2022 йил 6 май санасида бош мураббийлик постини қабул қилиб олган. Ундан олдин эса мураббий "Шахтёр" Қарағандида иш олиб борган. 45 ёшли мутахассис Қозоғистон билан ўтказган 6 ўйинида 4 ғалаба, 1 дуранг ва 1 мағлубият қайд этган. Ёмон натижа эмас, бизнингча. 

Шунингдек, россиялик мураббий сайтимиз учун берган интервьюсида ўзбек футболида маҳоратли ўйинчилар ва мураббийлар борлиги, терма жамоамизни муносиб рақиблар сирасига қўшиши, шунингдек, агар Ўзбекистон УЕФАга кирадиган бўлса, европача футболга мослашиш учун бироз вақт керак бўлиши борасида ўз фикрларини билдириб ўтган эди. 

Адиев жамоада асосан, 5-4-1 тактик схемасидан фойдаланиб келмоқда. Ушбу ишланма вақти-вақти билан 3-4-3 кўринишига ҳам келади. Яъни қозоғистонликлар замонавий 3 марказий ҳимоячи билан ўйнашни яхши ўзлаштириб бормоқда. Бу борада вазият Ўзбекистон терма жамоаси билан ўхшаш. 

Футболчилар билан танишамиз.

Футболчилар орасида энг қиммат дея кўрсатилган ўйинчи Бахтиёр Зайнутдинов саналади. У "Transfermarkt" порталида 3,5 миллион еврога баҳоланган. Бахтиёр Қозоғистон терма жамоаси сафида 24 баҳсда ўз номига 10 та гол ёздириб қўйган.

Қайд этиш лозим, ЦСКА вакили ўз вақтида "Ростов" сафида айни пайтда "Рома" аъзоси ҳисобланадиган Элдор Шомуродов билар бирга тўп тепган. 

Шунингдек, РПЛнинг "Зенит" клуби вакили Нурали Алип 1,5 миллион евро нарх билан терманинг энг қиммат иккинчи футболчиси ҳисобланади. Марказий ҳимоячи "лочинлар" либоси остида 20 та ўйинда майдонга тушган. Бироқ ҳозирча у ўз ҳисобига гол ёздириб қўймаган.

Жамоа сардори, "Тобол" клуби ярим ҳимоячиси Аскат Тагиберген 750 минг еврога лойиқ кўрилган ва у терманинг учинчи энг қиммат ўйинчиси бўлиб турибди. 32 ёшли тажрибали футболчи айни пайтга қадар Қозоғистон таркибида 40 та ўйин ўтказган. Ҳозирча унинг ҳисобида гол мавжуд эмас. 

Қўшимча қилиб шуни айтиш мумкинки, таркибдан Марат Бистров ("Ахмат", Россия), Ян Вороговский ("Моленбек", Бельгия), Георгий Жуков ("Чангжу Майти Лайинс", Хитой) ва Алексей Шёткин ("Кубан", Россия) сингари легионерлар ўрин олган.

 

Бўлиб ўтадиган Ўзбекистон - Қозоғистон беллашувида икки томонга ҳам омад тилаймиз. Шунингдек, қўшниларимизга Европа майдонларида муваффақиятлар тилаб қоламиз!

 

 Шоҳрух Зоиров тайёрлади.

 

 

Қозоғистон терма жамоаси бош мураббийи: "Ўзбекистон муносиб рақиб, бу ўйин биз учун ҳам қизиқарли".