Бугун легионеримиз учун муҳим баҳс бор!

Беларусь кубогининг чорак финал босқичи баҳслари давом этмоқда. Шаҳбоз Умаров ўйнаётган БАТЭ жамоаси мазкур босқичнинг жавоб учрашувида “Витебск” меҳмони бўлади.

Бу жамоаларнинг бир ой аввал ўтказилган биринчи ўйинида борисовликларнинг 2:1 ҳисобида қўли  баланд келган эди. Жавоб учрашуви олдидан БАТЭнинг имконияти юқори баҳоланмоқда. Чунки “Витебкс” кейинги пайтда ишончли ўйнай олмаяпти. Евгений Чернухин шогирдлари чемпионатда ҳали ғалаба қозонгани йўқ. Учта баҳсдан икки очко олди холос.

Беларусь кубогининг бу йилги мавсумида 60 га яқин жамоа курашга киришган эди. БАТЭ мусобақага 1/16 финал босқичидан қўшилди ва “Гранит-Микашевичи”ни 5:0, “Динамо-Брест”  4:2 ҳисобида енгиб, чорак финалга етиб келди.

Ҳозирча, кубок ўйинларида “Торпедо-Белаз” ва “Ислочь” ярим финал йўлланмасини ҳал қилди. Яна бир жуфтликда Шаҳзод Убайдуллаев ўйнаётган “Шахтёр” футболчилари “Неёман” билан куч синашади. Бу жамоалар ўртасидаги биринчи учрашувда солигорскликлар 3:0 ҳисобида зафар қучган ва ярим финал йўлланмасига яқин турибди.

“Нёман” – “Шахтёр” ўртасидаги жавоб учрашуви Тошкент вақти билан 17:00да, “Витебск” – БАТЭ ўйини 19:00да бошланади.