"Бу мавсум кўпроқ гол уришни хоҳлайман" - Норхонов "Хоразм"га қарши ўйин, дублга эришгани ва пенальти ҳақида

Улуғбек Бақоев бош мураббийлик қилаётган “Бухоро” клуби 3-турда номинал мезбон сифатида ўйнаган “Хоразм”га қарши ишончли ҳаракат қилди ва 1:4 ҳисобида ғалаба қозонди.

“Бухоро” ҳужумчи Шохруз Норхонов жамоасининг дастлабки иккита голига муаллифлик қилиб, дублга эришди.

Ўйиндан кейин ҳужумчи Sports.uz сайтига интервью берди.

- Шохруз ғалаба билан табриклайман. Аввало, ўйин ҳақидаги фикрларингиз билан ўртоқлашсангиз...

-  Авваламбор, кириб келаётган Рамазон Ҳайит байрами билан барчани табриклайман. Ўйинга келадиган бўлсам, биз учрашувга 100 фоиз тайёргарлик кўрдик ва ўз олдимизга қўйган мақсадимизга эришдик. Ўйин давомида гол ўтказиб юборган бўлсак ҳам фақат ғалаба учун ўйнадик ҳамда йигитларга охиригача бор кучлари билан ўйнагани учун раҳмат айтаман.

- Учрашувда иккита гол урдингиз. Бу сиз учун кутилмаган ҳолат бўлмадими?

- Тўғри, анчадан бери ҳали бундай бўлмаганди. Лекин бу мавсум кўпроқ гол уришни хоҳлайман.

- “Бухоро” мавсумни мағлубият билан бошлаганди. Аммо кейинги иккита ўйинда ғалабага эришди. Бундан чиқди, илк турдаги мағлубият тасодифмиди?

- Тўғри, биз биринчи турда аламли мағлубиятга учрадик. Лекин мураббийлар бизни яхши қўллаб-қувватлагани учун кейинги ўйинларга яхши тайёргарлик кўра олдик.

- "Хоразм" иккита ўйинда ғалаба қозонганди. Бу ҳолат ўйин олдидан сизларга рақиб ҳақида қандай тасаввур берганди?

- “Хоразм” жамоаси иккита турни ғалаба билан бошлади. Жамоа яхши шаклланган. Биз рақибимизни яхши ўрганиб чиқдик ва ғалаба қозондик. “Хоразм” жамоасига кейинги учрашувларда омад тилайман.

- Улуғбек Бақоев қўл остида сиз кўпинча ўзингизни кўрсата оласиз. Бу нима билан боғлиқ?

-  Ҳа, тўғри айтасиз. Улуғбек Бақоев қўл остида яхши натижаларга эришдим. Мураббий футболчиларни яхши тушуна олади.

- Биринчи голни пенальтидан урдингиз. Жамоада штатли пенальтичи ўзингизмисиз ёки ўша вазиятда тепишни хоҳладингизми?

-  Жамоада пенальти тепадиган бошқа футболчи ҳам бор. Ўша вазиятда ўзим тепишни хоҳладим.