Бош мураббийсиз қолган “Рома” Шомуродов ва яна бир неча футболчига жавоб бериб юборди
- 12-ноябр 2024, 08:00
- Zohir Toshxo’jayev
- 1
- Футбол
Европанинг аксарият лигаларида миллий чемпионатларда қисқа танаффус эълон қилинди. Ноябрь ойига белгиланган ФИФА кунларида мамлакатлар терма жамоалари навбатдаги йиғин ва турли даражадаги учрашувларини ўтказади.
Сўнгги маълумотларга қараганда, Италия чемпионатининг юқори дивизионидан 176 нафар футболчи миллий терма жамоалардан чақирув олган.
Кўпчиликни “Рома”даги ҳолат қизиқтирмоқда. Клуб хўжайинлари сентябрь ойи ўрталарида бош мураббийликка тайинланган хорватиялик мутахассис Иван Юрични истеъфога чиқариб юборди. Айни пайтда жамоада бош мураббий йўқ.
Шунга қарамай, Рим клуби мутасаддилари миллий терма жамоалардан чақирув олган жами 11 нафар футболчига жавоб бериб юборди. Бундан ташқари, римликларнинг уч нафар иқтидорли ўйинчилари ҳам турли ёшдаги терма жамоаларга жўнаб кетди.
Sports.uz портали “Рома” фаолиятини ёритаётган манбаларнинг ФИФА кунлари муносабати билан пойтахт клубида бўлаётган ўзгаришлар ҳақида тарқатган маълумотларини ўзбекистонлик футбол ишқибозлари эътиборига ҳавола қилади.
Италия чемпионати халқаро учрашувлар учун эълон қилинган танаффус муносабати билан вақтинча тўхтатилди. “Рома” машғулотларга тайёргарлик кўрмоқда, лекин бош мураббий Иван Юрич истеъфога чиқарилган.
Рим клуби футболчилари машғулотларни чоршанба куни бошлайди. Бироқ жами 14 нафар ўйинчи Тригория билан хайрлашиб, ўз мамлакатлари терма жамоаларига жўнаб кетади.
Италия миллий терма жамоаси бош мураббийи Лучано Спалетти “Рома”дан фақатгина Никколо Пизиллига таклиф юборди. Лоренцо Пеллегрини ва Брайан Кристанте каби тажрибали ўйинчилар клубда қолади.
Бундан ташқари, Томмазо Бальданци 21 ёшгача бўлган футболчилардан таркиб топган Италия ёшлар терма жамоасига жаоб қилинди.
А Сериянинг сўнгги турида ўз майдонида “Болонья”га имкониятни бой берган “Рома” халқаро танаффусдан фойдаланиб, кейинги ўйинларга яхшироқ тайёргарлик кўриши керак. Таркибда терма жамоаларга жалб қилинмаган айрим юлдузлар ҳам машғулот ўтайди.
Хусусан, Пауло Дибала ва Матиас Суле бу гал Аргентина терма жамоасидан таклиф олмади. Лионель Скалони Рим вакилларидан фақатгина Леандро Паредесга суянадиган бўлди. Ману Коне Франция терма жамоаси сафида Исроил ва Италияга қарши учрашувлар учун тайёргарлик кўради.
“Рома”нинг яна уч нафар футболчиси – Мэтью Райан Австралия, Абдулҳамид Сауд Саудия Арабистони ва Элдор Шомуродов Ўзбекистон миллий терма жамоаси сафида 2026 йилги жаҳон чемпионатининг Осиё саралаш турнири учинчи босқичида иккитадан муҳим учрашувларда иштирок этиши кутилмоқда.
Шунингдек, Эван Ндика Кот-д'Ивуара, Артём Довбик Украина, Никола Залевски Польша, Зеки Челик Туркия терма жамоаларидан чорлов олиб, Тригорияни тарк этди.
Таъкидлаш жоизки, Элдор Шомуродов сардорлигидаги Ўзбекистон миллий терма жамоаси бу гал иккала учрашувни ҳам сафарда ўтказади. Сречко Катанец шогирдлари 14 ноябрь куни Доҳада Қатар футболчилари билан куч синашади.
19 ноябрь куни Ўзбекистон миллий терма жамоаси КХДР футболчиларига қарши саф тортади. Бу баҳс нейтрал майдонда ташкил қилинади ва учрашувга Лаос мезбонлик қилиши белгиланган.