"Боруссия Д" устози Мадриддаги "камбэк"ни қандай изоҳлади?

Кеча Дортмунднинг “Боруссия” клуби Чемпионлар лигаси умумий босқич 3-тури доирасида Мадридда "Реал"га қарши майдонга тушди ва танаффусга 2:0 ҳисобида ғалаба билан чиқди. Бироқ, немис гранди ушбу устунликни ушлаб туролмади, “қироллик клуби” иккинчи бўлимда рақиб дарвозасига нақд 5 та гол урди. Якуний ҳисоби - 5:2.

Дортмундликлар устози Нури Шаҳин иккинчи бўлимда ҳисобни сақлаб қолиш учун ҳимоявий ўйинни танлади ва учрашувни беш нафар ҳимоячи билан давом эттирди. Ўйиндан сўнг туркиялик мутахассис бу борада ўз фикрларини билдириб ўтди.

“Мен хатоимни тан оламан, баҳона изламайман. Аслида бешта ҳимоячидан иборат чизиқ тезроқ ҳаракат қилишга ёрдам бериши керак, буни тушунтириб ўтирмайман. Биз бу орқали яккама-якка ҳолатларда жуда кучли ҳисобланган Винисиус ва Родригони тезда тўхтатмоқчи эдик", - деди Шаҳин. 

“Боруссия” навбатдаги учрашувини 26 октябрь, шанба куни Германия чемпионати доирасида меҳмонда “Аугсбург”га қарши ўтказади.