"Бавария"га қарши баҳс олдидан "Байер"нинг муҳим футболчиси сафдан чиқди

"Байер"нинг асосий футболчиларидан бири Флориан Вирц тўпиғидан жароҳат олиб, бир неча ҳафтага сафдан чиқди.

Жамоанинг 21 ёшли ярим ҳимоячиси Бундеслиганинг 25-тур доирасида "Вердер"га қарши ўйиннинг 52-дақиқасида жароҳатланди. Рақиб жамоа футболчиси Митчелл Вайзер яккама-якка курашда унинг ўнг оёғига зарба берди.

Тўқнашувдан сўнг Вирц ўрнидан тура олмади ва унга тиббий ёрдам кўрсатилди.

Эслатиб ўтамиз, жорий мавсумда ярим ҳимоячи Германия чемпионатидаги 25 та ўйинда 9 та гол уриб, 10 та голли узатмага муаллифлик қилган.