“Бавария” учинчи супертрансферга қўл урди

“Бавария” раҳбарияти янги бош мураббий Венсан Компанини янги трансферлар билан қўллаб-қувватламоқда.

Мюнхен клуби мутасаддилари бу гал юлдуз ўйинчиларни олишга эътибор қаратмоқда. Ёзги трансферлар даврида ҳозиргача иккита футболчи олиб келинди. “Фулхэм”да ўйнаган португалиялик ярим ҳимоячи Жоау Палинья ва “Кристал Пэлас” ҳужумкор футболчиси Майкл Олисе бундан буён мюнхенликлар шарафини ҳимоя қиладиган бўлди.

Энди “Бавария” асли ПСЖга тегишли бўлган Хави Симонс трансферига киришди. Париж клубида асосий таркибдан жой берилмагани боис Симонс ПСЖда қолмаслигини билдирган.

ПСЖ бу ўйинчини фақат ижарага беради. Чунки парижликлар Хави Симонсни 2025 йилнинг январигача тўлиқ сотиб юборса, трансфердан келган маблағнинг 40 фоизини ПСВга ўтказиб беришига тўғри келади.

“Бавария” Париж клубига ўз таклифини берди. Унга кўра, мюнхенликлар Хави Симонсни бир йилга ижарага олиб, кейин 90 миллион евро эвазига тўлиқ трансфер қилмоқчи.

Экспертлар бу вариант ПСЖ хўжайинларини қониқтириши мумкинлигини таъкидлади. Ҳозир клублар ўртасида музокара ўтказиляпти.