"Барселона"нинг ўйинини издан чиқаришда ҳакамларнинг қарорлари ҳам роль ўйнади

Алоҳида пост сифатида номашҳур фикрни айтмоқчиман: бу ўйинда ҳакамлик қарорлари тактик омилга айланди.

Доимий кузатувчилар билишади, таҳлилларимда тез-тез такрорлайман ўзимни ҳакамлик бўйича эксперт деб ҳисобламайман ва алоҳида эпизодларга баҳо беришга уринмайман. Аммо битта қарор ёки бир қатор қарорлар тенденцияга айланиб, ўйиннинг тактик манзарасига таъсир кўрсатса, буни қайд этишга ҳаракат қиламан. Қарорларнинг тўғри ёки нотўғрилигига баҳо бермасдан (буни шахсий фикр сифатида айтишим мумкин, лекин таҳлилларда эмас). Бу учрашувда ҳакамлик, шубҳасиз, ўйин ҳарактерига таъсир кўрсатди. Албатта буни инкор этиш ғалати бўларди.

“Атлетико Мадрид” бўш ҳудудлардан унумли фойдаланиб, қарши ҳужумларда “Барселона”ни ажойиб тарзда босим остида қолдирди. Бу жиҳатдан сифат ва гўзаллик бор эди. Аммо “Барселона”нинг ўйинини издан чиқаришда ҳакамларнинг қарорлари ҳам сезиларли роль ўйнади.

Ҳакамнинг ўйинга таъсири менга ўйиннинг илк дақиқасидаёқ кузатилди. Жулиано  Бальдега нисбатан жуда қўпол ўйнади, бироқ у ҳатто сариқ карточка ҳам олмади.

Бу бир марталик ҳолат эмас, балки умумий тенденциянинг бир қисми эди. “Барселона” футболи  бу маҳорат ва нафислик санъати. Бундай эпизодлар эса уни бузишга қаратилган тажовуздек туюлади. Менимча, бундай қўполликларга нисбатан анча қатъий чора кўрилиши керак.

Мен аниқ бир ҳақиқатни айтиб ўтаман: “ҳаммасига ҳакам айбдор”, деган бир фикр билан “0:4 бўлса ҳам ҳакамлик ҳақида гапириш уят”, деган иккинчи фикр орасида мутаносиб, вазмин позиция ҳам мавжуд. 

Ҳакамлар ўзи ўйин манзарасига таъсир қилдими? Ҳа, сезиларли даражада. Бу “Атлетико Мадрид”нинг аъло даражадаги тайёргарлигини ёки "Барселона"нинг муваффақиятсиз ўйинини инкор этадими? Албатта, йўқ. Адолатлироқ бошқарув бўлганида ўйин қандай кечарди? Буни аниқ билмаймиз. Эҳтимол, икки томонда ҳам кўпроқ вазиятлар юзага келарди, аммо барибир устунлик “Атлетико” томонида қолиши мумкин эди. Зеро, улар бу ўйинга жуда пухта тайёргарлик кўрган эди.

 

 

 

 

Вадим Лукомский мақоласи, Абдукарим Атаев таржимаси