“Барса” кутган тўпурар “Арсенал”ни танлади

“Атлетико Мадрид” ҳужумчиси Хулиан Альварес кўпчилик кутганидек “Барселона”га ўтишни истамади ва яна Англия Премьер-лигасига қайтиш вариантини танлади.

TEAMtalk нашри хабар беришича, Англия Премьер-Лигасида пешқадамлик қилаётган Лондоннинг “Арсенал” клуби вакиллари 26 ёшли аргентиналик ҳужумчининг агентлари билан ёпиқ музокаралар ўтказди.

Манба маълумотига кўра, ҳар икки томон ўзаро ҳамкорлик бўйича бир тўхтамга келган ва Альвареснинг “Арсенал”га ўтиши деярли ҳал бўлган масала, деб ҳисобланмоқда.

“Барселона” ва “Челси” томонидан қизиқиш бўлишига қарамай, “Арсенал” трансфер масаласида тезроқ амалий ҳаракатларни амалга оширди, бу эса клубга музокараларда муваффақиятга эришиш имконини берди.

Битимнинг муваффақиятли якунланишидаги асосий омиллардан бири — “Арсенал”нинг Альварес ва “Атлетико Мадрид”нинг барча талабларини қондиришга тайёрлиги бўлди.

Бу молиявий шартлар ҳамда ўйинчиларни муаммосиз рўйхатдан ўтказишни таъминлашни ҳам ўз ичига олган бўлиб, бу ҳолат “Челси” ва “Барселона” учун қийинчилик туғдириши мумкин эди.

Манба таъкидлашича, Альварес “Арсенал” таклифини мамнуният билан қабул қилган, чунки у анча вақтдан бери Англияга қайтиб, совринлар учун курашишни орзу қилаётган эди.

Жорий мавсумда у Атлетико Мадрид сафида 44 та ўйин ўтказиб, 17 та гол урди ва 9 та голли узатма амалга оширди.

Футболчининг клуб билан шартномаси 2030 йилнинг ярмигача амал қилади, Transfermarkt маълумотига кўра унинг бозор қиймати 90 миллион еврони ташкил этади.