Баҳром Ҳайдаров "Андижон"га қарши ўйиндан сўнг: "Биз ҳам шунақа дарвозабонимиз бўлишини хоҳлардик"

Суперлиганинг 16-туридан ўрин олган "Андижон" - "Қўқон-1912" (3:0) ўртасидаги учрашувдан кейинги матбуот анжуманида дастлаб меҳмонлар бош мураббийи Баҳром Ҳайдаров иштирок этди.

- Кўпчилик кўрди, албатта 3:0 ҳисобидан кейин бир нима дейиш қийин. Бахона қидиргандек бўлиб қолишимиз мумкин. Иккита голни ҳисобга олмасак тенг жамоа билан ўйнаётгандек эдик. Гапириш жуда қийин. Чунки жуда оғир ҳисоб. Ютқазмаслигимиз керак, деб ўйлаётгандим. Биринчи бўлим ҳам, иккинчи бўлим ҳам тенг курашлар остида ўтди. Лекин индивидуал маҳорат эвазига биринчи ва иккинчи голлар дарвозамизга киритилди. Бизда ҳам вазиятлар бўлди. Лекин “Андижон” дарвозабонини терма жамоадаги ўйинларида ҳам кўргандик, таҳлил қилгандик. Биз ҳам шунақа дарвозабонимиз бўлишини хоҳлардик. Ўйлайманки, бу дарвозабон ғалабага жуда катта ҳисса қўшди. 0:0 бўлиб турганида ҳам, ютқазаётган чоғимизда ҳам жуда яхши имкониятларимиз бўлди. Дарвозабон ярим жамоа деб бежизга айтишмайди. Албатта, “Андижон”ни қолган ҳамма ўйинчилари ҳам меҳнат қилишди. Аммо дарвозабонини алоҳида таъкидлаб ўтган бўлардим. Ҳимоя чизиғимизни ҳам бир нима дейиш қийин. Яхши десак, ҳисоб бунга тўғри келмаяпти. Учрашувни кўриб чиққанимиздан кейин хулосага келишимиз мумкин.

- Биринчи бўлимдан то учрашув охиригача бешта ҳимоячи билан ўйнадинглар. Шу ҳақида фикрингиз?

- Йўқ, 5 та ҳимоячи билан эмас. Рақиб ўйинини таҳлил қилганимизда Абдуманнопов билан Абдуманнонов кенг ўйнашади. Уларни ОКМК билан ўйинини ҳам таҳлил қилдик. Шунга мажбур эдик. Аммо тўп биздалигида уч ҳимоячи билан...Бизда асосан уч ҳимоячи. Фақат иккала қанот ҳимоячилари ҳам бор, мажбур бўлдик. “Андижон” футболчиларини кенг жойлашуви ҳисобига шунга мослаб тайёргарлик кўргандик. 5 та ҳимоячи дегани, ютқазмасак бўлди, деб майдонга тушмадик. Агар ўйин давомида натижа ўзгарганида биз ҳам ўзгариш қилмоқчи эдик. Рақибни иккала қанот ўйинчилари деярли охиригача ўйнашгани учун схемамизни алмаштирмадик.

- Иккинчи голдан кейин олдинги чизиққа ҳужумчи туширсангиз бўлмасмиди?

- Биласизми, иккинчи голдан кейин мени тушунчам бўйича аксинча учта ҳимоячи қолсангиз, иккала қанот футболчилари тепага кўтарилади. Бу схемани 4 та ҳужумчига мосласангиз бўлади. Ютқазгандан кейин буни нотўғри қилган бўлишимиз мумкин, буни ўрганиб чиқамиз. Бу саволга жавоб бериш қийин.

- Иккинчи давра йирик ҳисобдаги мағлубият билан бошланди. Давралар оралиғидаги таркибда юз берган ўзгаришлардан кўнглингиз тўлдими?

- Учта янги футболчи таркибимизда майдонга тушди – Гадоев, Датси ва Ҳайдаров. Ҳайдаров билан Датси ҳужумчи. Гол уришмади. Бугунги ҳисоб ҳамма нарсани кесиб қўйяпти-да. Уларни мақташга ҳам ожизмиз. Гадоевни бироз ўйини қовушмади, жамоага қўшилиб кета олмади. Унга вақт керак. Чунки у иккинчи давра бошланишига яқин келди. Датси билан Ҳайдаров гол ура олмаган бўлса ҳам босим ўтказишга ҳаракат қилишди. Аммо 0 га ўйнаганимиздан кейин кўнглингиз тўлмайди-да. Меҳнат қилишди, ёмон ўйнади, деб бўлмайди. Шу ўринда ишқибозларимизга катта раҳмат. Йўл босиб келишди ва стадионда охиригача қўллаб-қувватлашди. Ютқазаётганимизда ҳам кетиб қолишмади, уларга катта раҳмат ва узр сўрайман.