Ассалом Париж! Бугун Испанияга қарши ўйнаймиз!

Бугун ўзбекистонлик спортчилар Париж-2024 ёзги Олимпия ўйинларидаги иштирокини бошлайди. Аниқроғи, Франция пойтахтидаги муҳташам "Парк де Пренс" ўйингоҳида Тимур Кападзе бошчилигидаги Олимпия терма жамоамиз Испанияга қарши гуруҳ босқич илк учрашувини ўтказади. Ушбу баҳс Тошкент вақти билан соат 18:00 да старт олади.

Терма жамоамиз бугунги баҳсни тўлиқ оқ рангли либосда ўтказади. Учрашувни эса африкалик ҳакамлар бригадаси бошқариб боради. Бош ҳакам — Беида Даҳане (Мавритания), унга қанотларда Жерсон Сантос (Ангола) ва Стефан Йиембе (Кения) ёрдам беради. 4-расмий ҳакам вазифаси Дрюв Фисчерга (Канада) топширилган. Лаҳло Бенбраҳам (Жазоир) эса VAR'да фаолият олиб боради.