Асрор Алиқулов: "Ҳимоячиларимизга кўплаб саволларимиз бор"

Муборакнинг "Машъал" клуби Тошкентда “Пахтакор”га қарши учрашув ўз дарвозасидан жавобсиз бешта тўп ўтказиб юборди. 

Мазкур  учрашувдан кейинги матбуот анжуманида меҳмонлар бош мураббийи Асрор Алиқулов ўз фикрларини айтди.

- Биринчи навбатда “Пахтакор”ни йирик ҳисобдаги ғалабаси билан табриклайман. Бу уларнинг чемпионатдаги биринчи ғалабаси, бизнинг эса биринчи йирик мағлубиятимиз. Мухлислар олдида узр сўраймиз. Кийиниш хонасида ушланиб қолганимиздан ва куттириб қўйганимиз учун узр. Ҳимоядаги камчиликларимиз, футболчиларимиз савияси, тезлик борасида, тез фикрлаш ва жисмоний курашларда тўлиқ “Пахтакор” ютди. Кўп имконият бериб юбордик. 2:0 дан кейин ҳам футболчиларимизни ҳужум қилишга ундадик. Кўп хатолар бўлди ва “Пахтакор” бизни жазолади.

- Тошкентга келаётган кўп жамоалар “Пахтакор” салобати туфайлими майдонга чўчиб тушишади. Шу нарсадан халос бўлган жамоагина “Пахтакор”га муносиб қаршилик кўрсата олади. Бугун футболчи руҳий жиҳатдан учрашувга тайёрмиди ёки айнан илк дақиқаларда руҳий устунлик бой берилгани ҳисобига вазият шундай тус олдими?

- Бу тўғри факт. Биринчи ўйинда ҳам руҳий ҳаяжон сезилди. Бугун руҳий томонлама, футболчиларни ўзларига ишончсизлиги, нотўғри қарорлар, кераксиз жойларда тўп йўқотиш ва “Пахтакор”нинг прессингидан чиқиб кетиш ҳолатларида жуда секин фикрладик. Футболчиларда Суперлигада ўйин амалиёти йўқлигини ҳам сабаб қилиш мумкин. Ўйингача ҳаракат қилдик, лекин ўйинда чиндан руҳий ҳолат яққол сезилиб қолди. Ҳамма устунлик “Пахтакор”нинг қўлида эди.

- Салифуни эрта алмаштирдингиз. Қишда ҳам уни ҳали ўйинларга 100 фоиз тайёр эмас дегандингиз. Салифу кўп жабҳада улгурмагани учун уни алмаштирдингиз, деган фикр пайдо бўлди. У ҳақида фикрингиз қандай? Тикланишга қанча вақт кетади ва кейинги турда ротаниця сифатида ўрнида бошқа ўйинчини кўрамизми?

- Ротация бор. Ўтган йили про лигада ҳаракат қилган футболчимиз ва Дилшод Раҳматуллаев ҳам бор. Салифуга келадиган бўлсак, унда жисмоний ҳолатида, озгина вазн томонлама муаммолари бор. Бу борада ишлаяпмиз. Вазни бор, тезлиги баланд эмас. Шу боис ҳам бугун “Пахтакор”нинг тезкор футболчилари фонида у бўшлиқларни ёпишга улгура олмаяпти. Уни бироз жароҳати туфайли захирага олдик.

- Кейинги ўйинларда ҳам рақибни мана шундай кучли босими бўлган тақдирда жамоада қандай тактик ўзгаришлар бўлади? Мураббийлар штабида бу борада қандайдир режалар борми?

- Ҳа, кўриб чиқамиз. Кейинги рақиб бошқа. Кўряпсиз, бу йил кўпинча меҳмонда ўйнашга мажбурмиз. “Андижон” билан баҳсимиз бор. Ушбу рақиб ўйинларига қараб тактика танлаймиз. Ўйлайманки, бугунги учрашувдан келиб чиқиб, ҳимоя чизиғимизга ҳам кўплаб саволларимиз бор. Ҳамма ҳимоячиларимиз биргина Сергеевга якка курашларда 100 фоиз ютқазишди. Бу дегани оддий ҳолатларда ҳам Сергеев устун бўлди. Ҳимоядаги футболчиларимиз Суперлига савиясига, босимга, бундай курашларга тайёр эмаслиги кўриниб қолди.