Анвар Бердиев: "Керак бўлмаган жойда очко йўқотдик"

Про лиганинг 23-турида “Шўртан” “Хоразм”ни қабул қилди ва унда 1:1 ҳисоби қайд этилди. Учрашувдан сўнг мезбонлар бош мураббийи Анвар Бердиев қуйидагича фикр билдирди.

- Жуда қийин ўйин ўтказдик. Бу бизга осонроқ бўлиши ҳам мумкин эди. Кўрдинглар, бошида яхши вазиятларни голга айлантира олмадик. Ундан кейин керак бўлмаган вазиятда оддий хато туфайли дарвозамиздан гол ўтказиб юбордик. Йигитлар ўзларида куч топишди ва ҳисобни тенглаштиришди. Шундан кейин ҳам имкониятларимиз бўлди. Голга айлантира олишмади. Керак бўлмаган жойда очко йўқотдик.

- Захирадан майдонга туширилган футболчилар ўйинни қанчалик кучайтира олдилар?

- Захирадан тушганлардан Зоиров гол ургач, ўйинга қўшилиб кетди, дея оламан. Аммо қолган футболчиларим бу учрашувда тўлиқ кучларини кўрсата олмадилар.

- Мавсум якунигача учта тур қолди. “Дўстлик”, “Машъал” ва “Арал” жамоаларига қарши ўйнайсизлар. Қайси ўйин сизга кўпроқ ташвиш туғдириши мумкин?

- Ҳали мавсум якунигача бешта ўйин бор. Чунки сиз айтган рақиблардан ташқари “Олимпик Мобиуз” билан “Қўқон-1912” клублари ҳам бор. Ҳар бир учрашувга охирги ўйиндек чиқиш керак. Бизда голли имкониятлар бўляпти. Ажаблантираётгани вазиятларни голга айлантира олмаётганимиздир. Биринчи даврада гол уриш бўйича учталикда эдик. Иккинчи даврада бу борада йигитларда ишончсизлик пайдо бўлиб қолдими, негадир вазиятларни голга айлантиришда оқсаяпмиз. Бунинг устида ишлаб, олдимизга қўйилган вазифани бажаришга охиригача курашамиз.