Алонсо “Реал” юлдузларини ўзига бўйсундирмоқчи

Россиянинг ЦСКА клуби собиқ футболчиси Олег Корнаухов “Реал” клубида бош мураббий Хаби Алонсо атрофида юзага келган вазият бўйича ўз фикрини билдириб ўтди.

Маълумки, “Реал”нинг ўйини ва натижаларидаги пасайиш, клубнинг ички муҳитининг бузилиши испаниялик мураббийни қийин аҳволга солиб қўйди.

- Хаби Алонсо “Реал”ни қайта қуришга уриняпти. У жамоанинг барча юлдуз  футболчиларини ўзига бўйсундиришни истайди. Алонсо буни “Байер”ни бошқарганида  уддалаган эди.

Леверкузенда қилган ишини Мадридда ҳам эплайман, чунки бу ердаги ўйинчилар анча кучлироқ, деб ўйлади.

Ҳозир қайта қуриш жараёни кетяпти, устига-устак жароҳатлар бор, қолаверса, “Реал”да кичик омадсизликда дарров кучли босим бошланади.

Хаби Алонсо зўр футболчи эди, катта жамоаларда ўйнаган, чемпион бўлган. Ҳозир эса, қийинчилик тагида қолди, аммо ҳали ҳеч нарса йўқотилгани йўқ, жамоаси биринчи ўриндан атиги тўрт очкога ортда қоляпти холос.

Алонсо бош мураббий сифатида бу босимларга бардош беришга ва орзу қилаётган жамоасини қуришга етарли даражада ечим топишига умид қиламан, - деди Корнаухов.