Александр Хомяков: "Қўрқинчли жойи йўқ, ишлар режа асосида кетмоқда"

“Андижон”нинг “Войтсберг” (Австрия) ҳамда “Рауфосс” (Норвегия) клубларига қарши ўйинларидан сўнг "Бургутлар" бош мураббийи Александр Хомяков клуб матбуот хизмати учун ўз таассуротлари билан ўртоқлашди.

“Тиғиз кун бўлди. Биз буни “дабл гейм” деб атаймиз. Бир кунда иккита ўйинни ўтказиш осон эмас. Майдонга тушган футболчиларимиз 90 дақиқа мобайнида тўлиқ куч билан ўйнадилар. Бевосита учрашувларга келсак, иккаласи ҳам бир-биридан қизиқарли кечди ва ҳар икки баҳсда ҳам вазиятлар ярата олдик. Бу оддий ўйинлар бўлмади.

Австрия жамоаси замонавий футбол намойиш этди. Ростини айтсам, рақибдан бундай ўйинни кутмаган эдим, менга ёқди. Гарчи, уларга ҳисобда ютқазган бўлсак-да, ўйин борасида кўп жабҳаларда рақибдан устунлик қилдик. Ўзимизнинг клуб ҳақида танқидий хулоса чиқара олмайман. Чунки сафимизга янги футболчилар келиб қўшилган ва бир-бирларини тушуниб олишлари учун вақт керак бўлади. Муҳими, ҳаммаси режа асосида кетяпти ва ўйиндан қониқдим.

Иккинчи ўйинга келсак, Норвегия футболи вакили бутунлай бошқача – жисмоний кучга таянган ҳолда тўп сурди. Рақиб бу жабҳада устунроқ эканлигини намойиш эта олди. Мени учрашувнинг дастлабки 20-30 дақиқасида ёмон ўйнамаганимиз қувонтирди. Биз яратмоқчи бўлган ўйинни кўрсата олдик, лекин ҳаммаси ҳам ўхшамади. Аммо бундан фожеа ясаш керак эмас. Чунки боя айтганимдек, ҳаммаси режа асосида кетмоқда. Ҳар иккала жамоа навбати билан ҳужумларга ўтишди. Тўғри ҳаракатланиб, тўпга эгалик қилдик. Ҳа, имкониятлар бўлди, аммо у қадар кўп эмас. Назорат беллашувларида ҳисоб унчалик катта аҳамият касб этмайди. Асосийси, футболчилар бир-бирини тушуниб, ўз ўйинимизни топиш устида ишлашга киришганлар.

Умуман олганда, биз деярли янги жамоа тузмоқдамиз. Тўғри, бунга ҳали вақт керак. Хуллас, мен бу мағлубиятлардан фожеа ясамоқчи эмасман. Қўрқинчли жойи йўқ. Юқорида айтиб ўтганимдек, ишлар режа асосида кетмоқда. Ишлашда давом этамиз. Ўз ўйинимизни топиб боряпмиз ва шу руҳда ҳаракатни олиб борамиз”.