А Сериянинг энг кучли ҳимоясига қарши турган Шомуродовнинг ўйини қандай баҳоланди?
- 3-феврал 2025, 07:59
- Zohir Toshxo’jayev
- 2
- Футбол
Элдор Шомуродовнинг “Удинезе” ва “Айнтрахт”га қарши ўтказган учрашувларда яхши ўйнаганидан кейин бош мураббий Клаудио Раньери легионеримизни “Наполи”га қарши баҳсда асосий таркибда майдонга туширди.
Бу пойтахт клуби мураббийлар штабининг ўзбек футболчисига бўлган ишончини кўрсатди. Чунки А Серияда пешқадамлик қилаётган “Наполи” энг кучли ҳимояга эга. Неаполликлар “Рома” билан ўйингача 22 та учрашувда ўз дарвозасидан атиги 15 та тўп олиб чиққан эди.
“Олимпико”даги тўқнашувда кучлар тенг келди – 1:1. Элдор Шомуродов майдонда 80 дақиқа ҳаракат қилиб, ўрнини жаҳон чемпиони Пауло Дибалага бўшатиб берди.
“Рома” фаолиятини ёритиб бораётган laroma24.it сайти экспертлари жамоа ўйинчиларининг ҳаракатини қуйидагича баҳолади.
СВИЛАР 5,5:
Рақиб футболчиси Спинаццола гол урган вазият дарвозабоннинг шошқалоқлиги оқибатидир. Свилар “Рома”ни мағлубиятдан қутқариб қолган Анжелинога раҳмат айтиб қўйиши керак.
РЕНШ 6:
“Рома”нинг янги ўйинчиси Ренш мураббийлар,жамоадошлари ва пойтахтлик мухлислар ишончини оқлай бошлади.
МАНЧИНИ 5,5:
Нерес ва Спинаццолага қарши анча самарали ҳимояланди. Бироқ гол киритилган вазиятда унинг ҳам айби бор.
НДИКА 6,5:
Эван Ндика “бўрилар” ҳимоясини ўз зиммасига олган. Бу футболчи “Наполи” юлдузи Ромули Лукакуга ҳеч қандай имконият қолдирмади.
АНЖЕЛИНО 7:
Чап оёқда йўллаган зарбаси римликларни мағлубиятдан қутқариб қолди. Учрашув давомида фаоллик кўрсатди. Майдонда қаттиқ кураш олиб борди.
КРИСТАНТЕ 5,5:
Ўйинга киришиб кетиши жуда қийин бўлди. Жуда кўп хато қилди. Оқибатда 64-дақиқада ўрнини Артём Довбикка бўшатиб берди.
ДОВБИК 5,5:
Клаудио Раньери вазиятни ўзгартириш учун бир неча янги кучларни майдонга туширди. Довбик кутилган даражада ўйин намойиш қила олмади.
ПИЗИЛЛИ 5:
Беллашувни фаол бошлаган ярим ҳимоячи кейинчалик ўйиндан тушиб қолди.
КОНЕ 6:
Бу футболчининг ҳаракатларини ижобий баҳолаш мумкин. Раньери ўйин тактикасини ўзгартириш учун Конени 56-дақиқада захирага олди.
ПАРЕДЕС 6,5:
Коненинг ўрнини эгаллаган тажрибали Леандрога ўйинни ўз қўлига олиши учун бир неча дақиқа кифоя қилди. Кейин маҳоратини кўрсата бошлади.
СУЛЕ 6:
Тўпни назорат қилишга уринди, курашларда кўп қатнашди. Римликларнинг голида иштирок этди.
ЭЛ-ШААРАВИ 5,5:
Ўйинда фаоллик кўрсатишига қарамай, ҳаракатлари ишончли чиқмади. Тез чарчаб қолди ва ўрнини Салэмакерсга бўшатиб берди.
САЛЭМАКЕРС 7:
Бу футболчи майдонга тушиши билан ҳужумни кучайтира олди. “Рома” гол урган вазиятда Анжелинога аниқ пас бера олди.
ШОМУРОДОВ 6:
Клаудио Раньерининг ишончини оқлашга уринди. Элдор ўйин давомида жуда кўп қора ишни амалга оширди. Меҳнаткашлиги унинг асосий қуроли. “Наполи” ҳимоячилари билан анча курашди, рақиб дарвозасига хавф солиб турди.
РАНЬЕРИ 6:
“Рома” трансфер бозорида фаоллик кўрсатмаяпти. Раньери қўл остидаги ўйинчилардан унумли фойдаланишга уриняпти. Ўйинчи алмаштириш орқали мағлубиятдан қутилиб қолди. Ўз вақтида амалга оширилган ўзгаришлари учрашув охирида самара берди. Клаудио Раньери “Рома”ни қабул қилиб олганидан бери жамоа ўйини ижобий томонга ўзгармоқда.