Vitaliy Levchenko "So‘g‘diyona" ustidan qozonilgan g‘alaba haqida gapirdi

O‘zbekiston Superligasi 1-turidan o‘rin olgan "So‘g‘diyona" va "Neftchi" jamoalari o‘rtasidagi o‘yin yakunlandi.

Mazkur bellashuvda mehmonlar 1:2 hisobida g‘alaba qozondi. Farg‘onaliklarning ikki golini ham nigeriyalik legioner Effiong Nsungusi kiritdi, jizzaxliklarning yagona goli esa Lyupche Doriev nomiga qayd etildi.

Shu tariqa, "yo‘lbarslar" ushbu g‘alabadan keyin 3 ochkoga ega bo‘ldi va jadvalda yuqori o‘rinlardan joy oldi.

Bellashuvdan so‘ng farg‘onaliklar ustozi Vitaliy Levchenko o‘z fikrlari bilan o‘rtoqlashib o‘tdi: 

"Barcha muxlislarni chempionat boshlangani bilan tabriklayman. Havo juda sovuq bo‘lishiga qaramasdan, tribunada ishqibozlar juda ko‘p edi va ularga shunchaki respekt. 

O‘yinga kelsak, juda ko‘p kurashlar guvohi bo‘ldik. Shuning uchun, kombinatsiyalar va o‘ylangan hujumlarda biroz oqsashlar bo‘ldi. Bu hali o‘yin rejimiga tushib olmaganimizdan dalolat. Biz uchun eng muhimi 3 ochko edi va yigitlarni bu g‘alaba bilan tabriklayman".