"Strandja". Bugun bokschi qizlarimizni to‘xtatib bo‘lmayapti

Xabaringiz bor, Bolgariyaning Sofiya shahrida an’anaviy 77 "Strandja" xalqaro turniri o‘tkazilmoqda.

-51 kg vazn toifasida ikkinchi jangini o‘tkazgan vakilamiz Feruza Kazakova qozog‘istonlik Jazira Urakboyevaga qarshi ringga ko‘tarildi. Qiziqarli va murosasiz kechgan bahsda hamyurtimiz 5:0 hisobida g‘alabani qo‘lga kiritdi.

-57 kg vaznda sportchimiz Humorabonu Mamajonova braziliyalik Serkuero Romeroga qarshi kurash olib bordi Jiddiy raqibga qarshi Mamajonova juda yaxshi harakat qildi va yakunda 3:2 hisobida zafar quchdi.

Yana bir -57 kg vazn toifasidagi vakilamiz Nigina O‘ktamova angliyalik Elise Glinnga qarshi ringga chiqdi. Tajriba­li vakilamiz o‘zining ishonchli harakatlari bilan raqibasiga imkon bermadi va 4:1 hisob­i bilan g‘alabaga erishdi. 

-60 kgda yurtimiz sharafini himoya qilayotgan ikki vakilamiz Sitora Turdibekova hamda Mushtariybonu Ibrohimjonovani qur’a ilk bosqichdayoq bir-biriga to‘qnash keltirdi. Bu qarama-qarshilik ikki raund davom etdi va murabbiylarimiz 3-raundni Mushtariybonu davom ettirmasligini bildirishdi. Shu tariqa Turdibekova navbatdagi bosqichga yo‘l oldi.

-65 kgda Jahon chempionati finalchisi, Jahon kubogi g‘olibasi Navbahor Hamidova ha o‘z yurishini boshladi. U ilk to‘qnashuvda Qozog‘iston vakilasi Arujan Jangabaevaga qarshi ringga ko‘tarilishi kerak edi. Ammo uning raqibasi uchrashuvdan bosh tortganligi sababli, g‘alaba Navbahorga topshirildi.

Eslatib o‘tamiz, bizni oldinda yana bir charm qo‘lqop ustamiz Javohir Ummataliyev va Santos Dos Belini (Braziliya) jangi kutmoqda.

Bu haqida O‘zbekiston boks federatsiyasi xabar bermoqda.