Qozog‘istonlik murabbiy o‘zbek bokschilariga tan berdi!

​​Qozog‘iston Respublikasida xizmat ko‘rsatgan murabbiy Tursun'gali Edilov "Sportarena.kz" nashriga bergan intervyusida Ulan-Batorda bo‘lib o‘tgan turnirda o‘zbekistonlik bokschilarning ishtirokiga baho berdi. Mazkur musobaqada Qozog‘iston terma jamoasi medallar jamg‘arish bo‘yicha birinchi o‘rinni egallagan edi.

"Ushbu turnirga terma jamoamiz bosh murabbiyi Nurjan Nasanov asosiy yetakchilarni olib bordi va natijada to‘rtta oltin medal qo‘lga kiritildi. O‘zbekiston esa ikkinchi-uchinchi raqamli tarkib bilan kelib, uchta oltin medalni qo‘lga kiritdi. Bu nimani anglatadi? O‘zbekistonda zahira borasida hech qanday muammo yo‘q", — dedi Tursun'gali Edilov.

Mutaxassisning ta'kidlashicha, Ulan-Batordagi musobaqada ayrim qozog‘istonlik bokschilar kutilgan natijani ko‘rsata olmadi.

"O‘zbekiston jamoasida ham hamma birdek yaxshi chiqish qilmadi. O‘rta vazn toifasida Asadullaev muvaffaqiyatsiz ishtirok etdi. Ammo umumiy taassurot shuki, ularning aksariyati juda istiqbolli yigitlar. Madaminov -65 kg vaznda eng yaxshisi bo‘ldi, Erkinboev yarim og‘ir vaznda nihoyatda raqobatbardosh ekanini ko‘rsatdi, yosh Mamasoliev esa -90 kg gacha bo‘lgan vazn toifasida barcha raqiblarini mag‘lub etdi. Qo‘shni mamlakatda aksariyat olimpiya vazn toifalarida raqobat juda kuchli. U yerda yoshlar yetakchilarga bo‘shashishga imkon bermaydi. Bizda-chi? Qator vaznlarda murabbiylar kimni yuborishni o‘ylab qolishadi yoki bitta yetakchi bor-u, uning ortida esa bo‘shliq", — deya fikr bildirdi mutaxassis.

Qozog‘iston terma jamoasining sobiq murabbiyi, shuningdek, o‘zbekistonlik murabbiylar ushbu turnirda nafaqat o‘z yosh bokschilarini sinovdan o‘tkazganini, balki qozog‘istonlik sportchilarni ham sinchiklab o‘rganganini qayd etdi.

"Men ko‘p bora aytganman: bizdagi katta muammo shundaki, O‘zbekistonda bokschilarni biznikilarga qarshi janglarga juda jiddiy tayyorlashadi. Bizda esa go‘yo bunday yondashuv yetishmaydi. Masalan, Mahmud Sabirxon bilan Shahzod Muzaffarov o‘rtasidagi jangni oling. Avval ular uch bor to‘qnash kelishgan va har safar bizning bokschimiz oson g‘alaba qozongan edi. Bu safar esa ikki karra jahon chempioni g‘alabani tom ma'noda “tishlari bilan sug‘urib oldi”. Shu bois, Osiyo o‘yinlarida bizning bokschilarimiz o‘zbekistonlik raqiblarga qarshi juda qiyin janglar o‘tkazadi, deb o‘ylayman. Chunki ular bizni puxta o‘rganib chiqishgan, biz esa ularning yetakchilarini yetarlicha tahlil qilmaganmiz", — dedi Edilov.

Eslatib o‘tamiz, yozgi Osiyo o‘yinlari 19 sentabrdan 4 oktabrgacha Yaponiya­ning Nagoya shahrida bo‘lib o‘tadi. Qozog‘iston erkaklar terma jamoasi ushbu turnirda so‘nggi bor 2014 yilda g‘olib chiqqan bo‘lib, undan keyingi ikki Osiyo o‘yinlarida muvaffaqiyatsizlikka uchragan. Bu haqida O‘zbekiston boks federatsiyasi xabar bermoqda.