"Nasaf" g‘alaba qozondi, "Bunyodkor" "So‘g‘diyona"ni yuta olmadi

O‘zbekiston Kubogi 2-tur uchrashuvlari bo‘lib o‘tmoqda. Bugun bir necha o‘yinlar o‘tkazildi.

"S" guruhidan o‘rin olgan "Nasaf" - "Rubin" bellashuvi o‘z yakuniga etdi. Unda qarshiliklar 4:0 hisobida g‘alaba qozondi. "Ajdarlar"ning gollariga Abubakr-Rizo Turdaliev, Murodbek Xo‘jamberdiev, Sardor Sa’dullaev hamda Shohmalik Komilov mualliflik qildi.

Shuningdek, ushbu guruhning ikkinchi bahsida "Bunyodkor" o‘z maydonida "So‘g‘diyona"ni qabul qildi. Teng kurashlar ostida kechgan uchrashuvda tomonlar 1:1 hisobidagi durangga imzo chekdi.

Dastlab, Daniel Nasriddinov hisobni ochgan bo‘lsa, Shahboz Jo‘rabekov 65-daqiqada o‘z darvozasini ishg‘ol etib qo‘ydi.

Shu tariqa, "S" guruhida 4 ochko to‘plagan "qaldirg‘ochlar" peshqadamlik qilmoqda. Eng yaqin ta’qibchi "Nasaf" ham shuncha ochko jamg‘argan. Ikkita o‘yinda durang qayd etgan "So‘g‘diyona" uchinchi, hali ochko qo‘lga kirita olmagan "Rubin" so‘nggi pog‘onani egallab turibdi.