Kannavaro: "Muammo taktikaда emas, ruhiyatda edi — g‘alaba uchun har doim bir xil ishonch bilan chiqishimiz shart" (to‘liq matbuot anjumani)

Ўзбекистон миллий терма жамоамиз бош мураббийи Фабио Каннаваро Габонга қарши беллашувдан сўнг ўз фикрлари билан ўртоқлашди. 

Бугун биринчи бўлимда ҳимоявийда бироз хатолар кузатилди. Танаффусда қандай кўрсатма бердингизки, улар ишонч билан ҳаракат қилишни бошлашди ва Жаҳонгир Ўрозовнинг ўйинига тўхталиб ўтсангиз. 

"Биринчи тайм билмайман нега, ўзимизга ишонмаган кўринади. Концентрация юз фоиз эмас эди. Танаффусда уларга ҳар доим қилишимиз керак бўлган ишни қилишимиз кераклигини айтдим. Тактика томонлама ўзгаришлар қилдик, лекин асосийси руҳий муаммо эди. Бизнинг мотивациямиз рақибларга қарамасдан, ҳар доим юқори даражада бўлиши керак. Биз ҳар доим майдонга ғалаба учун чиқишимиз керак. Шунингдек, бир хил мотивация билан чиқиш керак. Бундай беқарорликка йўл қўймаслигимиз зарур. Масалан, сўнгги дақиқаларда кўрдингиз, ўйин бизнинг назоратимиз остида ўтаётган эди, лекин жуда ҳам хавфли ҳужумлар бўлди". 

Замонавий футболда стандарт вазиятлар жамоаларнинг асосий қуролларига айланиб бормоқда. Бугун жамоамиз ҳам икки гол урди, бу футболчиларнинг маҳорати эвазига бўлдими ёки бунинг устида иш олиб бориляптими? 

"Албатта, биз машғулотларда барча жиҳатлар бўйича ишлаймиз. Агар бир мавсум давомида 40 ёки 45 гол уриш мумкин бўлса, унинг учун яхши ҳужумчи керак. Баъзида бизга вақт етмайди. Бизда 2 ёки 3 кун вақт бор тикланиш учун ҳамда кейинги ўйинга тайёргарлик кўришимиз зарур. Замонавий футболда кичкина деталларга эътибор бермасангиз, баъзан ғалаба қозона олмайсиз". 

Кечаги матбуот анжуманида айтиб ўтдингиз, бўлажак баҳсларда кўплаб футболчилар имкон бераман деб. Бугун эса дастлабки ўзгаришлар 76-дақиқада амалга оширилмоқда. Бу кеч эмасми? 

"Бугун захирадан 8 ўйинчи майдонга тушди. Албатта, мен сизнинг фикрларингизни ҳурмат қиламан. Мен жуда ҳам кўп ўйинчиларни чақирганман. Агар сиз менинг ўрнимда бўлганингизда, бошқа фикрлаган бўлар эдингиз". 

Габон терма жамоаси ҳақида фикрингиз қандай? 

"Габон терма жамоасининг ўйинларини томоша қилиб чиқдик. Албатта, ўйинчиларда маҳорат бор, уларнинг қандай ўйнаши ва яхши жиҳатлари бор. Бугун уларга қарши майдонда ўйнаш қийин бўлди". 

Бугун ўнг қанотда Азиз Ғаниев ҳаракат қилмоқда. Лекин ҳозирги кунда Суперлигада ўзининг энг яхши даврини ўтказаётган Жамшид Искандеров бор, бугун биз уни асосийда ёки захирадан майдонга тушишини кутган эдик. Нима учун футболчига имкон берилмади ва Венесуэлага қарши ўйинда майдонга тушадими? 

"Дубайдаги клубида ўнг қанотда ҳаракат қилади. Жамшид Искандеров ҳам жамоанинг бир бўлаги ҳисобланади. Биз унинг иқтидорини биламиз. Албатта, биз барчага ҳаракат қилиши учун етарлича вақт берамиз". 

Бугун Габон терма жамоасига қарши ҳам жисмоний томонлама айрим пайтларда имкониятни бой бердик. Мураббий бу устида қандай ишлар олиб боришяпти? 

"Бу нормал ҳолат. Шу сабабдан ҳар доим барча тушунтиришга ҳаракат қиламиз. Сиз Европа ёки Африка жамоаларига ўйнасангиз, жисмоний фарқ жуда кўзга ташланади. Агар биз 100 фоиз тайёр бўлмасак, биз қийналишимиз аниқ". 

Абдуқодир Ҳусанов кейинги ўйинга қайтади. Биз Венесуэлага қарши ўйинда яна янги номлар кўришимиз мумкинми Жаҳонгир Ўрозов каби футболчилар сингари. 

"Ҳозир ўйинчиларимиз қайта тикланиши керак. Яхши уҳлаб, дам олишлари зарур. Эртага эрталаб машғулотимиз бор. Бизда ҳали ҳам тикланиш давом этади. Шунинг учун бизнинг вақтимиз кўп бу ҳақида ўйлаб кўришга. Бироқ, бизнинг асосий эътиборимиз - ҳар доим янги ўйинчиларни кўриш, лекин ўз навбатида мувозанатни ҳам ушлашимиз керак. Агар ютқазиб қўйсак, сизлар (журналистлар) келиб, менга эътироз билдирасизлар. Бу менинг жуда кўп футболчини алмаштириб юборганим учун рўй беради. Шу сабаб, ҳар доим ўйлаган ҳолда, энг яхши ечимни топишга интиламан".