Husanov Gonkongda o‘ynaydi!
- 21-апрел, 18:05
- Zohir Toshxo’jayev
- 0
- Futbol
Англия Премьер-лигасининг етакчи клубларидан “Манчестер Сити” 2026-2027 йилги мавсумга тайёргарлик доирасида етти йиллик танаффусдан сўнг илк бор Гонконгга қайтишини расман эълон қилди.
Шунингдек, манчестерликлар сафар давомида Италия чемпионлигини қўлга киритиши кутилаётган Миланнинг “Интер” клубига қарши ўйнайди. Ушбу учрашув Гонконг футбол фестивалининг марказий ўйинига айланади ва “Кай Так” стадионида бўлиб ўтади.
“Манчестер Сити” янги мавсумга тайёргарлик режасини пухта ишлаб чиқди ва ёзги логистика билан боғлиқ турли муҳокамалардан сўнг жамоа 2019 йилдан бери илк бор Гонконгга йўл олиши маълум бўлди.
Ушбу турне клуб учун муҳим стратегик қадам ҳисобланади. Чунки жамоа Узоқ Шарқдаги кенг мухлислар базаси билан алоқаларни янада мустаҳкамлашни мақсад қилган. Бу сафар Пеп Гвардиола давридаги устунликни давом эттиришга умид қилинаётган янги мавсум учун асосий старт майдони сифатида ҳам кўрилмоқда.
Тарих такрорланади
Турненинг асосий воқеаси сифатида 2023 йилги тарихий УЕФА Чемпионлар лигаси финалининг такрори ташкил этилиши кутилмоқда. 1 август куни “Манчестер Сити” ва “Интер” футболчилари Asahi Super Dry кубоги учун ўзаро тўқнаш келади.
Ушбу ўйин Гонконг футбол фестивали доирасида янги қурилган “Кай Так” стадионида ўтказилади. Бу эса Премьер-лига тикланишидан бир неча ҳафта олдин “Сити”га юқори савиядаги рақибга қарши ўйнаш имконини беради.
City Football Group компаниясининг ҳамкорликлар бўйича вице-президенти Питер Ланди клубнинг бу воқеадан мамнунлигини билдириб: “Биз “Манчестер Сити”нинг Гонконгга қайтишини эълон қилаётганимиздан ва ёзги илк йиғин ўйини Осиёда ўтказилишини тасдиқлаётганимиздан хурсандмиз.Гонконг ва бутун минтақадаги мухлисларимиз ҳар доим ажойиб садоқат кўрсатиб келган. Биз яна улар билан бирга бўлишни интиқлик билан кутяпмиз”, - деди.
TEG Sport компанияси бошқарув директори Рейчел Кэрролл ҳам бу фикрни қўллаб-қувватлади ва Гонконгнинг етакчи спорт маркази эканини таъкидлади.
Унинг сўзларига кўра, ўтган йилги мусобақанинг катта муваффақиятидан сўнг бу гал “Манчестер Сити”ни Asahi Super Dry турнирида қабул қилиш ва мухлисларга унутилмас таассуротлар тақдим этишдан мамнунлик ҳис этишмоқда.
Нега Гонконг танланди?
“Манчестер Сити” ва “Интер” Европанинг нуфузли мусобақаларида яхши таниш рақибларга айланган. Улар охирги марта 2024 йил сентябрда тўқнаш келган. Бироқ Чемпионлар лигасидан ташқари форматдаги сўнгги учрашувлари 2011 йилда бўлиб ўтган.
“Кай Так” стадиони Осиёдаги замонавий стадион инфратузилмасининг энг юқори намунаси ҳисобланади ва икки йирик жаҳон клуби ўртасидаги ўйин учун муносиб майдон сифатида қаралмоқда.
“Манчестер Сити” учун Гонконг билан боғлиқ хотиралар жуда ижобий. Жамоа 2019 йилдаги сўнгги ташрифида “Китчи СК”ни 6:1 ҳисобида мағлуб этган эди.
Сўнгги вақтларда геосиёсий ноаниқликлар сабаб айрим клублар учун Яқин Шарқдаги йиғинлар масаласи мураккаблашган бир пайтда, Осиёдаги ушбу босқич “Манчестер Сити”нинг ёзги режаларига аниқлик киритмоқда.
Шу билан бирга, Уго Виана ёзги трансфер ойнаси даврида фаоллик кўрсатиб, таркиб янги футболчилар билан тўлдириши кутилмоқда. Шу сабабли Гонконгдаги ўйин янги мавсум олдидан жамоанинг тактик ўзгаришлари ҳақида илк тасаввурни бериши мумкин.
Ҳусанов жойини сақлаб қолиши керак
2025 йилнинг 20 январида “Манчестер Сити”га қўшилган Абдуқодир Ҳусанов дебют мавсумида етарли ўйин амалиётига эга бўлмайди. Бироқ жорий мавсум ўзбек футболчиси асосий таркибга ёриб кирди.
Жамоа ҳимоя чизиғида юзага келган муаммолар чоғида ҳар томонлама ўзини кўрсата олган Ҳусанов Хосеп Гвардиола ва у бошчилик қилаётган мураббийлар штабининг тўлиқ ишончини оқлади.
Айни пайтда “Манчестер Сити” ҳимоя чизиғини Абдуқодирсиз тасаввур қилиб бўлмаслигини Англия футболи экспертлари эътироф этмоқда.
Демак, Абдуқодир Ҳусанов келаси мавсумга жамоанинг асосий фигураларидан бири мақомида тайёргарлик кўради ва катта меҳнат билан эришган бошланғич таркибдаги ўрнини сақлаб қолиш ва мустаҳкамлашга ҳаракат қилади.