Erkin kurashchilarimiz Turkiyada ajoyib natijalar qayd etishdi

9 yanvar kuni Turkiyaning Istanbul shahrida erkin kurash bo‘yicha "Yasar Dogu-2020" an’anaviy xalqaro turniri start olgan edi. Mazkur turnirda ishtirok etgan O‘zbekiston terma jamoasi ham muvaffaqiyatli ishtirok etdi desak yanglishmaymiz. Sababi, joriy yil hisobidan o‘rin olgan ilk turnirda -70 kg vazn toifasida gilamga chiqqan Ilyas Bekbo‘latov finalda mezbon kurashchi Xaydar Yavuzni mag‘lub etib,oltin medalni qo‘lga kiritdi. -57 kgda yurtimiz sharafini himoya qilgan G‘ulomjon Abdullaevdan esa finalda biroz omad yuz o‘girib, bolgariyalik Georgiy Vangelovga imkoniyatni boy berib, kumush medal bilan cheklandi. -97 kg vazn toifasida Rio Olimpiadasi sovrindori Magomed Ibragimov xuddi Braziliyadagi kabi bronza medali sohibiga aylandi. 

Eng og‘ir vaznli kurashchimiz ya’ni, -125 kgda gilamga chiqadigan Hasanboy Rahimov bronza medali uchun bahsda mezbonlar vakilini mag‘lub etib, shohsupadan o‘rin oldi. Hasanboy Qozog‘istonning Nur-Sulton shahrida bo‘lib o‘tgan jahon chempionatida Tokio Olimpiadasiga yo‘llanmani ham qo‘lga kiritgan edi.