Хамзат Чимаев: "Камарсиз ҳам Шон Стрикленддан беш баравар кўп пул топяпман"

UFC собиқ чемпиони Хамзат Чимаев амалдаги чемпион Шон Стриклендни танқид қилди. Унинг айтишича, Стрикленд реваншдан бош тортган ва ҳозир Нассурдин Имавовга қарши жанг учун таклиф қилинган гонорардан норози бўлмоқда.

"UFC дан менга жанг ташкил қилиб беришларини сўрадим, энди нима бўлишини кўрамиз. Асосий мақсадим — чемпионлик камарини қайтариб олиш. Мен ўша баҳсда ғалаба қозонганимга ишонаман, аммо камарни мендан олиб қўйишди.

Мен ҳакам эмасман, жангларни баҳоламайман. Лекин бутун жанг давомида орқага чекиниб ҳаракат қилган ҳолда чемпионлик камарини қўлга киритган жангчини илгари кўрмаганман. Бу UFC тарихида биринчи марта содир бўлди. Шон бутун баҳс давомида қочиб юрди ва чемпион бўлди. Мен эса олдинга бориб, босим ўтказиб, оғир зарбалар бердим. Аммо бўлган иш бўлди, бу ҳақда нолиб ўтирмоқчи эмасман.

Менда камар йўқ, аммо барибир яхши пул ишлаяпман. Чемпионлик камарини олган йигит эса ҳалигача пул тополмаяпти. Мен ундан беш баравар кўп даромад қиламан. У мен билан жанг қилишга рози бўлиши керак эди. Аммо бошқа рақибни танлашга уринди, энди эса пулдан шикоят қиляпти. Агар Стриклендга пул керак бўлса, мен билан жанг қилиши лозим эди", — деди Чимаев Бретт Окамотога берган интервьюсида.

Шунингдек, Чимаев UFC навбатдаги UFC жанги бўйича ҳозирча ҳеч қандай маълумотга эга эмаслигини айтди. Шу сабабли у RAF лигасида иштирок этишда давом этади.

"Кейинги жангим ҳақида ҳеч нарса билмайман. Бу саволни Дана Уайт ва Хантер Кэмпбеллга бериш керак. Аввал ҳам айтганимдек, мен жанг сўрадим, аммо ҳеч нарса бўлмади. Шунинг учун RAF да курашяпман ва пул ишлаяпман", — деди "Борз".

Эслатиб ўтамиз, Чимаев шу ҳафта охирида Лас-Вегасда бўлиб ўтадиган "RAF 14" турнирида аралаш яккакурашлар ветерани Робби Лоулерга қарши гиламга чиқади.