Уганда термаси футболчиси Роналдунинг рекордини урганидан хурсанд

Уганда футбол федерацияси расмий сайти мамлакат терма жамоаси ҳимоячиси Бевис Мугаби баландга сакраш бўйича “Манчестер Юнайтед” тўпурари Криштиану Роналду рекордини янгилаганини эълон қилди.

Мугабининг ўзи бунга муносабат билдирди.

- Тўғрисини айтсам, мен акам телефон қилиб, баланд сакраганимни айтмагунича, бу ҳақда ўйлаб ҳам кўрмаган эдим. Ўша пайт бор фикрим жамоамга уч очкони олиб беришга қаратилганди. Голим ўшанда жамоам учун жуда зарур бўлган уч очко келтирганидан хурсанд бўлгандим, - деди Бевис Мугаби.

26 ёшли ҳимоячи Шотландия премьер-лигасининг 2021 йилги мавсумида 8 фут ва 6 дюйм баландликка сакраб гол урди. Аввалги рекорд натижа Криштиану Роналдуга тегишли бўлиб, португалиялик тўпурар 2019 йили “Ювентус” сафида “Сампдория”га гол урганида 8 фут ва 5 дюйм баландга сакраган эди.